Cinco luna pasa el a entrega verwijsbrief y awor ta tende cu kizas te luna di Juli 2023 lo bay atende

The content originally appeared on: Diario

ORANJESTAD (AAN): Recientemente e ciudadano Giovanni Arendsz, durante un conferencia di prensa pa splica loke a pasa cune y su yiu chikito na Servicio di Emergencia ImSan, a elabora tambe riba un otro asunto relaciona cu cuido medico.

   ImSan ta conoci tambe como un lugar cu ta atende aspectonan di specialistanan di wowo.  Segun Arendsz, e mes tin un verwijsbrief entrega na ImSan pa check su wowo.  El a entrega e carta aki net 5 luna pasa.  E asistente di Specialista a bise na un forma amable: “Meneer, kico bo kier pa nos haci?  Bo por yama na Januari of Februari pa nos wak, pasobra

e lista ta asina yen, cu pa April otro aña ainda no tin lugar.”

   Aruba, awor mi ta bati na porta di AZV.  Kico ta pasando pa loke ta e Specialistanan cu Aruba mester?  Ta tende cada rato di e medidanan cu ta corta paki-paya den AZV, y ya tin di paga pa cierto remedi.

  “Mi no ta aki pa critica, pero mi ta aki pa comparti, y haya sa te unda nos como ciudadano tin di sinta wanta y warda pa e detaye aki?” Esey tabata pregunta di Giovanni Arendsz.

   “Mi sa cu tin un Ministro concerni, cu mi tin di dune aplauso pa e parti turistico cu ta bayendo maraviyoso y ta haciendo trabao maraviyoso, pero na dado momento si bo ciudadanonan no ta bon cuida… ta con nan lo bay cuida e turistanan?”

   Si e Specialistanan no ta dunando atencion, of ta pa falta di medico, ta haci cu nos tin di paga?  “Nos no ta pidiendo cos pornada.  Nos ta pagando mensualmente placa pa AZV caba, y esey ta wordo kita di nos salario, pa nos por haya e atencion medico.”

   El a bisa cu ora bo yega na e balie di Docter y Specialistanan, ta bolbe puntra e asistente riba e asunto.  Nan a keda di yame bek na fin di Maart 2023 pa check si acaso tin cupo, y ki dia lo haya cupo pa kizas entre Juni pa Juli.   “Pasobra e demanda ta asina halto!”

   Arendsz a bisa cu un banda di wowo di dje so tin bon bista, y e otro ta hopi troebel.

   E ciudadano a indica cu esnan na Aruba cu tin suficiente placa gespaar, por subi avion y bay busca yudanza inmediato den exterior.  Pero e ora ey, kico lo para cu Aruba su Aseguro General?

   Arendsz ta pensa cu pueblo ta e motor principal di e isla.  E ciudadano tin mester di su salud pa asina por duna turismo e atencion.  “Si nos no tin salud, ta con nos por bay duna e turista e atencion?  Si nos yiu di tera ta pasando asina malo, cu esaki y esaya, nos lo por haya ayudo?”

   Segun Giovanni Arendsz, semper e tabata considera ImSan como un di e top lugarnan pa medicina na Aruba, aunke e ta balora Dr. Horacio Oduber Hospital tambe.  Pero pakico tin asina hopi tardanza?

   Relaciona cu su recien declaracion encuanto su yiu cu a keda como 5 ora wardando den Servicio di Emergencia na ImSan, y na final a opta pa bay cas cu e mucha pasobra no ta husto pa keda warda asina hopi, Arendsz a indica cu e tabatin hopi admiracion pa e unico Docter laborando e anochi ey na ImSan, unda e so tabata luchando pa atende tur hende.  Un enorme presion, sin conta e 8 pashentnan wardando pafo di 5:00 pm te cu casi 12:00 am.