Chaman Peruano cu a viola dos dama y mishi c’un otro condena na 4 aña di prison

The content originally appeared on: Diario

Hues ta haya cu el a abusa di e confianza cu e damanan a pone den dje

ORANJESTAD (AAN): Diabierna mainta via video conference, Hues di Corte di Husticia a dicta sentencia den e caso penal cu Ministerio Publico a cuminsa contra e homber Peruano C.J.I. (42). Luna pasa tratamento di e caso a tuma lugar caminda Fiscal a exigi 5 aña di prison pa e Chaman Peruano. Hues a haya C.J.I. culpable y a conden’e na menos castigo cu Fiscal a exigi y a ordena C.J.I. pa paga daño cu e tres damanan a demanda. 

SENTENCIA

Hues a bisa cu e ta haya legalmente proba e acusacionnan cu riba 22 November 2021, C.J.I. a viola e dama B., entre 13 November 2019 y 26 November 2019, el a viola e dama E. y cu riba  18 November 2021 a tacha honor di e dama C., door di mishi na su partinan intimo. 

A VIOLA Y MISHI CU E DAMANAN

Hues a bisa cu durante tratamento di e caso, C.J.I. ta desmenti di a viola dos dama y mishi na partinan intimo di un dama. Hues a sigui bisa cu C.J.I. a reconoce cu e tabatin relacion sexual cu e damanan B. y E. pero sin cu a forza nan. El a bisa cu e relacion sexual a sosode despues di e sessionnan di curacion y cu esaki tabata voluntariamente. E mishimento di e dama tambe tabata durante e session di curacion.

   Hues a bisa cu e ta kere declaracion di e victimanan. Na opinion di Hues, e forma di traha di C.J.I. ta cu e ta hinca e damanan den un estado y ta forza dos di tene relacion sexual y un a mishi na su partinan intimo.

   Hues a bisa cu no tin indicacion cu e victimanan, manera C.J.I. ta bisa, cu nan lo a palabra pa haci acusacionnan inhusto contra C.J.I.. Hues a mustra cu ademas di declaracion di e victimanan, C.J.I. mes a bisa cu e tabatin relacion sexual cu e victimanan. Hues a bisa cu tur esakinan ta wordo usa como prueba. 

VICTIMANAN NO POR A HACI NADA

   Hues a mustra cu for di declaracion di e victimanan por compronde cu durante e sessionnan di curacion nan cara tabata wordo tapa y diripiente nan ta haya nan confronta cu relacion sexual. Door cu nan tabata den un estado di relahacion pisa durante e session, nan no a resisti contra e relacion sexual. Hues ta haya cu C.J.I. tabata usa un forma di practica caminda e ta laga e victimanan den un estado cu nan no a resisti contra tene relacion sexual. Tambe Hues ta haya cu C.J.I. a haci actonan inmoral door di mishi na partinan intimo di un dama.

 

CASTIGO

   Pa cu e castigo, Hues a bisa cu e ta tene cuenta cu C.J.I. como Chaman durante session di curacion a abusa di dos dama. Tambe a mishi na partinan intimo di un dama.

Hues ta tuma C.J.I. na malo pa loke el a haci. E ta haya cu C.J.I. a abusa di e confianza cu e damanan tin den dje pa wordo cura. Hues a condena C.J.I. na  4 aña di prison, kitando e tempo cu e ta sera den KIA.

   Pa loke ta e demandanan di daño di e tres damanan, Hues a fiha pa e dama B., 5 mil florin y e resto di demanda el a declara no admisibel. El a bisa cu e dama lo por cuminsa un caso civil si e kier. Hues a honra e demanda di e dama E. cu en total ta 2800 florin y e dama C. 655 florin.