Chaldira Vis ta conseha victimanan di violencia domestico pa busca ayudo for di prome momento

The content originally appeared on: Diario

ORANJESTAD (AAN) – Chaldira Vis, di Fundacion Isabella, den entrevista cu DIARIO a enfatiza riba e consecuencianan di Violencia Domestico,

bisando cu tur hende muher mester corda pa no pasa den e mesun situacion cu e mes a pasa, y a keda pa semper riba un rolstoel debi na problema di pareha.

            Manera ta conoci Diasabra 25 di November tabata Dia pa elimina violencia contra hende muher, y den e contexto aki Chaldira ta aconseha tur hende muher cu ta pasando den algo asina, pa busca ayudo.   Tin stichtingnan cu ta brinda ayudo, aki na Aruba, anto pa nan acudi, pa pidi ayudo di nan famia, pa nan papia di nan problema pa stichting busca un solucion.

Bay na eventonan unda nan ta duna charla y ta sostene e hende muhe. Pero ta primordial pa nan papia cu hende tocante e situacion, pa no pasa cu nan locual a sosode su persona.

            Ora e situacion ta bayendo peor miho solucion ta separa pasobra cada un den e pareha tin derecho di ta feliz y di haci nan mesun bida, pero ora cu tin violencia domestico, for di prome instante ta miho pa separa prome cu e problema bira peor.

            Tambe el a menciona parehanan jong (adolescente) cu ya caba tin relacion di violencia, y si sigui den pareha cada bez ta mas fuerte. El a bisa cu tin hopi violencia na Aruba, y ultimo añanan aki e ta wak den media cu ta birando demasiado. E ta kere cu gobierno tambe por bin cu charla of haci algo pa stop e violencia domestico, pasobra e ta hopi alarmante na Aruba.

            Tin cifranan cu Fundacion contra violencia relacional (ex Fundacion pa Hende Muher y Homber den dificultad) a duna den un charla a duna di conoce cu aworaki tin 100 caso, esun mas jong tin 16 aña y esun mas grandi tin 69 aña y e ta considera cu esaki ta un cifra preocupante ya cu nos comunidad cada bez ta bira di mas edad, y tin hopi cu ta sconde e problemanan aki, y ta tempo pa haci algo y duna comunidad informacion.