“Cera e dump no ta e solucion: no por crea un di dos Parkietenbos”

admin

Rudy Geerman di FTA:

ORANJESTAD (AAN) – E lider di sindicato FTA Rudy Geerman, ta elogia e tremendo trabao cu e trahadornan di SERLIMAR ta haci cu recogemento di sushi.

Asina el a subraya den entrevista cu Matutino DIARIO. El a expresa cu esaki ta algo cu no por keda sin menciona, y cu FTA semper a y ta apoya e trahadornan aki.

El a señala cu a yega na e momento crucial, pa loke ta e dump di Parkietenbos na Aruba. “Mi no ta kere cu e solucion ta na e momentonan aki cera e dump. Nos gusta traha riba solucionnan temporal, kiermen, bo tin un corta, bo no ta trata e origen di e corta, pero bo ta djis pone un pleister riba dje. Mi no ta kere cu e solucion ta cera e dump di Parkietenbos, loke tin indicacion cu ta bay tuma lugar, anto habri otro dump otro caminda”, Geerman a vocifera.

Esaki pasobra aki un par di aña e problema ta na un otro caminda. FTA ta kere cu a yega e momento pa cuminza educa e pueblo y bin cu separacion di sushi. Geerman a subraya cu semper nos ta gusta wak Hulanda pa tuma ehemplo, anto pakico no tuma esey?

Siña separa sushi ta e comienzo di e dimension nobo cu nos tin cu bay. “Caminda for di cas caba bo ta separa sushi anto e ora ey bo ta bay planifica pa bin cu un sistema mihor pa recoge sushi. Mi no ta bay den detaye pasobra mi no ta un experto riba esaki. Pero na mundo tin yen di tecnologia”, e sindicalista a subraya.

E di dos preocupacion cu FTA tin, y nan a bise den pasado, ta e machine cu a wordo cumpra pa e minister anterior, unda cu e minister actual, sr. Sevinger a menciona cu e machine no ta sirbi.

“Nos a bisa foi biaha pasa cu mester pone e machine traha y demostra realmente cu e no ta sirbi. No por ta asina cu bo no a pone traha nunca anto bo ta bisa cu e no ta sirbi”, Geerman a remarca.

E ta kere cu ora minister Sevinger demostra cu e machine no ta traha, anto e ora ey e por cuestiona ex-minister Wever cu el a cumpra algo cu no ta funciona. “Pero mientras bo no por demostra esey ta keda un duda, pasobra ta hopi miyon di pueblo a wordo inverti y e ta para eynan. A wordo publica den prensa cu esey ta bay tuma lugar, pero no a sosode. Nos ta apoya e trahadornan den nan protesta di tur dia, y nos ta pidi gobierno pa tene cuenta cu aworaki nos a yega na un situacion cu nos lo no por crea un segundo Parkietenbos”, Rudy Geerman a enfatiza.

El a subraya tambe cu nos ta den e momento crucial pa haci e cosnan bon (manera separacion di sushi) pa nos futuro generacion. Si nos no hacie awor, cada bez cu tin un gobierno nobo ta cambia tur cos y ta miyones di florin ta bay perdi cada bez.

Tin hopi sistema moderno na otro paisnan y esey ta mihor manera pa nos haci tambe pa nos pais. Aunke e por tin un costo financiero halto, Geerman ta kere cu si no haci e cosnan corecto aworaki. E ta puntra di con haci cos rapido prome cu eleccion?

Geerman a expresa cu mester corda cu gobernacion ta continuidad y prome cu otro gobierno sinta bin cu un proyecto bon, cu aunke no ta di e gobierno nobo ta pa bon di Aruba y continua cune. Pero nos problema ta, segun Geerman, cu cada bez cu gobierno caba e proyecto di e gobierno cu a baha, ta lague para y placa di pueblo ta wordo mal gasta asina. El a pone como ehemplo un cas grandi cu e gobierno anterior a traha na Palestiaweg (SN)pa muchanan special, y a keda para eynan pasobra e gobierno aki no ta traha cu continuidad.

 

Next Post

Simposio di e Colegionan di supervision financiero ‘Sigui hunto den Reino Hulandes’

ORANJESTAD (AAN) — Diahuebs dia 22 di juni a tuma luga e simposio special di Cft na ocasion di despedida di e presidente y dos miembro di Colegio di supervision financiero. Ex-Gobernador y Ministro di Estado Jaime Saleh y ex-miembro di Tweede Kamer y presidente di e Comision Permanente di […]