Centralizacion den cuido medico ta mina y kibra e libertad y capacidad di autodeterminacion

The content originally appeared on: Diario

Parlamentario Arthur Vallejo: * Como hende, pashent y pueblo!

ORANJESTAD (AAN) – Manera ta conoci, Parlamentario Arthur Vallejo a presenta un mocion pa no fusiona HOH cu ImSan, y esaki a keda aproba pa decision unanime di Parlamento.

Den su disertacion den conferencia di prensa Dialuna, el a haci enfasis cu ta di suma importancia pa mantene y cuida mercadonan husto y habri pa tur competidor, splicando cu tin alomenos tres razon fundamental pa compromete cu mercadonan husto y habri pa negoshinan chikito, como maneho anti monopolio.

El a menciona e tres prome motibonan aki:


Negoshinan chikito ta brinda hopi beneficio pa e mercado consumidor. Den algun sector ta brinda mas balor y miho resultadonan na e competidor, cu esun di mas grandi. Generalmente, nan ta logra resultadonan superior tambe, debi na nan tamaño y proporcion.

“Mi a tende Minister di Economia papia di ‘Economy Skills’ (economia di proporcion) durante e ultimo reunion cu nos tabata tin den Parlamento. Loke nos ta wak cu ta purba haci cu ImSan, ta un ehemplo di con Aruba tin hopi problema, y di con asina tanto negoshi chikito tin problema cu supervivencia na largo plazo”, e parlamentario a splica.


Un economia pobla cu varios negoshi independiente y chikito, ta produci distribucion ekitativo di entrada y oportunidad. “Oportunidadnan pa nos yiunan di tera profesional por traha, den caso di ImSan, por ehemplo, entre otro ta duna oportunidad di empleo y ta crea support na un clase medio creciente y expansivo” el a agrega. Vallejo ta sigui bisa cu negoshinan di proporcion mas chikito, ta compatible cu democracia y su opuesto, esta poder economico concentra (otro palabra pe ta centralizacion di cuido medico), ta mina y kibra e libertad y capacidad di autodeterminacion como hende, pashent y pueblo.

“Aki mi kier trece otro punto dilanti. Mientras mi ta investigando tur tipo di ley anti monopolio, y mi ta purba compronde di con nos ta bezig ta wak diferente movecion asina, den e sector di salud, pasobra e ta preocupante, mi a cay riba un ley anti-monopolio hopi basico, cu referencia na Merca, den e Estado di North Dakota. Pa duna un ehemplo, na Estado di North Dakota na 1963, e Estado a adopta un ley cu ta bisa cu pa un farmacia por opera eynan, esey so por pasa si un farmaceutico ta doño di e farmacia. E proposito di e ley, ta pa sigura cu farmacianan, den e caso aki ta wordo maneha pa personanan cu ta comprometi cu salud y cu nan prome prioridad ta brinda cuido di calidad na un comunidad”, e parlamentario a relata.

Parlamentario Vallejo a bin ripara cu pa e tipo di negoshinan di salud na Aruba, en todo caso, ta similar, pero den e Departamentonan di Gobierno como institucion, esakinan a wordo manipula y cambia, na unda un director di Salubridad Publico, por ehemplo, no mester ta medico. Antes, tabata asina. Y un director medico di hospital no mester ta medico. Y akinan Parlamentario Vallejo a bin compronde exactamente kico ta pasando den sector salud cu locual e tin hopi preocupacion pe.