Celebracion Dia di Rey na caminda pa futuro nobo

The content originally appeared on: Diario

E calor entre Pueblo di Aruba y Cas Real ta motibo di optimismo — *Un relacion estatal unico ehempel pa hopi pais na mundo

ORANJESTAD (AAN) — Ta den situacionnan mundial sumamente dificil, Reina Wilhelmina a priminti e teritorionan Hulandes den Caribe un futuro constitucional nobo.

Tabata for di London cu Aruba tambe a wordo informa di e intencionnan di Reino pa introduci un sistema nobo cu lo tabata basa riba e forsa propio pero cu e boluntad di asisti otro.

Na 1942, na momento cu Guera a haci London sede di La Reina Wilhelmina, un relacion nobo a nace entre Aruba y Cas Real Hulandes.

Statuut a bira uno di e documentonan mas impresionante cu a wordo produci den e cambio di paisnan di colonia pa autonomia.

Interesante ta, e relacion cu a desaroya su mes entre Aruba y Cas Real, cu tambe ta un ehempel pa mayoria di paisnan na mundo cu ainda ta trata pa duna contenido di loke a nace den e epoca di colonialismo.

Sin mas por papia di un afecto real entre e Arubiano y miembronan di Cas Real Hulandes, hasta den e tempo cu Aruba tabata papia di Independencia.

E forma cu Miembronan di Cas Real tambe ta expresa nan mes den nan relacion cu Aruba, ta unico. Na Aruba nan ta sinti nan mes na cas y relaha.

Na e momentonan aki Aruba ta prepara pa drenta un futuro nobo, den cual e base estatal di Aruba sigur ta importante.

E situacion financiero di Aruba a crea e necesidad pa papia di reforma pa futuro, cu ta nifica yudansa y asistencia tecnico di Hulanda pa haci uzo di e asistencia financiero pa crea un futuro nobo despues di e crisis financiero, e pandemia di Covid-19 y awe un guera mundial.

Ora mira atras por conclui cu tabata Hulanda cu a bati alarma grandi pa reforma financiero necesario pa Aruba ma 2014 ora Hulanda a introduci supervision.

Kico lo a pasa si na e momento, Hulanda no a actua? Kico lo a pasa si Hulanda no por a interveni?

Awe Aruba ta celebra cumpleaños di Su Mahestad Rey Willem Alexander. Como parti di e monarkia Hulandes, Aruba ta fiha su bista riba un Rey cu for di su hubentud tabata gosa di “one happy island” Aruba.

Awe Aruba ta prepara tambe pa drenta un futuro di reforma, den cual francamente dos mentalidad financieramente ta topa otro den Reino Hulandes cu mester sigui cana drenta den futuro.

E mentalidad Europeo di e Pueblo Hulandes conoci pa e hecho cu e no ta gasta un cent si no ta sumamente necesario, mester uni na e mentalidad mas habri pa gasta placa pero cu den pasado tabata basa tambe riba seriedad ora ta gasta placa.

E mentalidad di e Arubiano den pasado tabata uno di reserva placa pa por sigui dilanti sin ta dependiente di otro hende.

E orguyo di e Arubiano di tin su cunuco, su propio produccion di cuminda y forma di sobrevivencia, por wordo descubri atrobe hunto cu Hulanda den creacion di un futuro nobo, cu lo por wordo alcansa cu mas facilidad entre Aruba y Reino cu e gran mayoria di paisnan cu a conoce colonialisacion.

E Arubiano ta parti di un monarkia, den cual Rey y Pueblo ta mira otro como hende, ta topa otro como hende y ta atende otro como hende,

Esaki ta e exclusividad den Reino Hulandes, cu a permiti Aruba mantene su identidad den Arubianismo.

Awe nos ta canta “happy Birthday” pa Rey, cu ta tene su mes haltura di salud di r Pueblo den Pandemia y ta preocupa su mes pa e loke ta pasa cu e Arubiano den e bida diario.

Ta cu e calor cu a uni Aruba y Cas Real, awe nos ta celebra Dia di Rey y nos ta yama Su Mahestad Rey Willem Alexander pabien!

Biba Rey, nos ta grita en busca di un formula pa hunto cu mundo politico di Hulanda yega na reforma pa Aruba cu un Monarkia Constitucional unico.