Celebra Dia di Betico na Playa y San Nicolas

admin

ORANJESTAD   (AAN):  Diahuebs awo Aruba lo ta celebrando Dia di Betico y ful rond di nos isla lo tin diferente actividad pa festeha e dia aki en grandi. Stichting Rancho lo ta organisando su Rancho Walking Tour cual ta encera un tour extenso di 2 ora den e centro di Playa pa asina conoce un tiki mas e historia di e bario aki. E prome tour lo tuma luga pa 9’or di mainta y e di dos tour lo cuminsa pa 11’or. Tur interesado por pasa na Flor de Oriente pa asina nan por disfruta di un caminata interesante den un di e barionan mas bieu di Aruba.

Riba e mesun dia aki, Mundi Health Café lo habri su portanan oficialmente pa e publico di Aruba. E café aki ta situa den e monumento di Nicolaas Store na San Nicolas. Nan lo habri nan portanan for di 8’or di mainta te cu 10’or di anochi pa deleita un y tur cu nan dushi cumindanan y bebidanan saludabel.

Ademas di esaki, Fundacion Museo Arubano tambe tin actividadnan planea na tur tres di su museonan. Museo Historico Aruba (Fort Zoutman), Museum of Industry y Community Museum lo habri nan portanan for di 10’or di mainta te cu 4’or di atardi pa asina duna henter pueblo di Aruba e oportunidad pa pasa bishita tur. Entrada na cada museo lo ta solamente 1 florin pa persona. Lo bai tin diferente stand di cuminda pa deleita e paladar di grandi y chikito y mas cu claro no por falta un bon variacion di cos dushi. E bar na cada museo tambe lo ta bon surti.

Na Museum of Industry, prome cu tur ambiente cuminsa, Princes Reanne lo canta Himno y representantenan di grupo di scout St. Joris, APG, AJMG y Pioneer Club Aruba, lo hisa e bandera. DJ Vito Geerman tambe lo ta presente pa entretene e publico cu bon musica durante henter e evento. Pa 12’or di merdia nos lo tin un presentacion special di Derron Ellies, un Steelpannist di e cuidad di Manzanilla na Trinidad & Tobago cu lo ta di bishita na Aruba en conexion cu e Carnival Heritage Festival. Derron a cuminsa toca desde su 10 aña y a haci presentacionnan na diferente pais. E lo deleita tur presente cu su musica y tambe lo conta mas tocante e historia di Steel Pan.

E aña aki e museonan lo ta organisando nan segundo Selfie Scavengerhunt “Nos Historia” cu e posibilidad pa gana diferente premio asombroso. Pa participa lo mester bishita tur tres museo y saca e selfies rekeri na cada un. E selfies mester wordo publica riba e Facebook di Fundacion Museo Arubano riba dia 25 mes. Tambe lo mester like e Facebook di Fundacion Museo Arubano, Museo Historico Aruba, Museum of Industry y Community Museum. E selfie cu mas likes lo gana e premio mayor cu ta un weekend stay na The Ritz-Carlton, Aruba.

Henter pueblo di Aruba ta keda cordialmente invita pa participa den e diferente actividadnan cu lo tin diahuebs awo. Sali un rato for di cas y pasa un rato ameno cu famia. Nos ta warda boso.

Next Post

Gobierno di Aruba invitando tur hende pa celebra Dia di Betico den grandi

ORANJESTAD (AAN): Celebrando e aña natalicio di nos Libertador sr. Gilberto Françios “Betico Croes”, Gobierno di Aruba tin un dia special prepara pa pueblo henter celebra na grandi Dia di Betico. E comision encarga cu e evento bou direccion di John John FLemming, a prepara e Programa Protocolar pa e […]