Caso di iregularidad na Aruba Huis a conoce su prome detencion

The content originally appeared on: Diario

Investigacion a drenta e siguiente nivel


Director Suplente Glenn Ling a keda deteni 

ORANJESTAD (AAN): Manera ta conoci, desde luna di October 2021 tin un investigacion administrativo tumando lugar na Aruba Huis.  Esaki a start, na momento cu a bira conoci cu varios detaye, cu “cosnan” a pasa na Aruba Huis cu probablemente no tabata bon.

   Gobierno inmediatamente a pidi Centrale Accountant Dienst pa haci un investigacion den tur e cifranan aki na Aruba Huis na Den Haag.

   Ora cu aña 2022 a drenta, a amplia e investigacion y a manda mas hende di Departamento di Recursonan Humano y encarga cu Finanzas, rumbo Den Haag pa baha riba Aruba Huis pa cualkier cos cu por a worde constata cu no ta bon pa coregi esey inmediatamente.

   Prome Ministro di Aruba mes e tempo ey a indica cu ta trata di un investigacion administrativo cu CAD ta haci cu bukinan pa mira si tur cos a tuma lugar corectamente of no.  A base di esey a introduci algun cambio caba na Aruba y esakinan ta pa percura cu tur cos ta cana bon den futuro.

   E investigacion di CAD na final a wordo poni den un rapport, y tin di analisa conseho di Departamento di Recurso Humano tambe.

   E investigacion riba e iregularidadnan na Aruba Huis, a tuma un rumbo di investigacion penal.

   Detencion riba Diaranson: Den un investigacion di LandsRecherche, a sali na cla cu nan a yega na un punto, cu Ministerio Publico a duna OK, pa nan bay detene e ex-funcionario Glenn Y. Ling di 61 aña di edad naci na Aruba.  El a keda deteni riba Diaranson.

   Su detencion ta relaciona cu “Tulpen Zaak”, cu na Papiamento yama “Caso Tulipan” cu LandsRecherche ta encarga cune.

   Caso Tulipan ta dirigi oficialmente riba “iregularidadnan” cu a tuma lugar na Arubahuis den e periodo di 2018 te cu 2021.

   E sospechoso Glenn Ling tabata traha e tempo ey como director suplente di Aruba Huis na Den Haag.

   E investigacion ta andando. Vocero di Ministerio Publico a splica DIARIO, cu no ta descarta cu mas detencion lo por cay.