Caso di asesinato y asalto na Savaneta posponi

The content originally appeared on: Diario

A pidi psychiater di Hulanda pa un raport mas detaya

ORANJESTAD (AAN):  E lamentabel caso di asesinato y asalto cu a sosode na Savaneta na Maart 2022, a wordo pospone. Ta trata aki di e caso caminda a haya e curpa sin bida di F. Angela banda di santana na Zeewijk. Investigacion a mustra cu F. Angela a bay duna un pareha na Savaneta lift pa bay Cura Cabay. Un acto di buena fe a resulta den un asesinato y asalto y awor e sospechosonan ta e homber J.B. y e dama W.W.

   E motibo cu e Hues a pospone e caso, cu tabata pro forma, ta pasobra cu Hues no ta contento cu e raport di psychiater riba e sospechoso J.B. 

ASALTO FATAL 

   Den sala di Corte tabata presente familiarnan di e difunto Angela, abogadonan di e sospechosonan, Fiscal y Hues, mientras cu e pareha sospechoso tabata den un oficina na KIA. Via video conference a trata e caso pro forma.

  Fiscal a acusa J.B. y W.W. di complice di asesinato y asalto ariba e anochi di 17 y 18 Maart 2022, caminda despues di a mata difunto F. Angela, nan a horta placa y bay cu e auto.

   For di e acusacion cu Fiscal a presenta den sala di Corte por a compronde cu tabatin violencia hopi bruto y cruel.

   Ta sospecha cu J.B. a bira cabez di e victima varios biaha. Tambe Fiscal ta acusa J.B. di lo a primi e victima su garganta cu forza y kibra su nek. Tambe di lo a pasa varios biaha cu auto riba e victima su cabez cu consecuencia cu e victima a fayece. Nan a horta placa y bay cu e auto, lagando e victima atras den vecindario di santana di Zeewijk.


RAPORT DI PSYCHIATER NO TA BON


            Fiscal a bisa Hues cu e procesverbaal oficial ya ta cla y lo wordo parti. E raport di psychiater tambe ta cla. Pero door cu ta den receso a pone e caso pro forma. Ta asina cu e raport di psicologo no tabata cla.

   Fiscal a propone pa dia 28 October 2022, dedica henter mainta pa tratamento di e caso. Hues a remarca cu e ta haya e raport di psychiater no ta hopi cla. Hues a bisa cu e kier un otro psychiater pa evalua e sospechoso. El a bisa cu un psychiater for di Hulanda a bin Aruba pa evalua un otro caso y posiblemente e lo por haci’e. Hues a bisa cu e psychiater aki ta specialisa den casonan asina. Hues a propone un otro pro forma pa asina sa con leu e raportnan ta.

   Hues a bisa cu 15 September 2’or lo tin otro pro forma pa mira con leu ta cu e raport y 28 October 2022 lo tin tratamento di e caso.