Carousel di Expresion ta un tremendo oportunidad pa e hobennan expresa pa medio di arte

The content originally appeared on: Diario

Departamento di Cultura ta anuncia proyecto pa temporada di vakantie

ORANJESTAD (AAN):  Na Cas di Cultura tabata tin un conferencia di prensa unda Robert Maduro, representante di Departamento di Cultura a anuncia dos proyecto cu ta na caminda.

            El a indica cu e prome ta trata di un proyecto pa e temporada di vakantie. Pesey, conhuntamente cu e organisacion di ‘Buki di Pret’ a delibera algun tempo pasa caba cu mester di un proyecto cu ta interesante pa e muchanan por siña for di e diferente disciplinanan di arte.

            Maduro a sigui bisa cu a palabra cu lo haci un proyecto cu ta un sistema di carousel di expresion caminda e hoben lo ta yega Cas di Cultura pa un dia completo.

            Ta bay tin 10 disciplina diferente di arte (manera musica, canto, pintamento, baile, expresion, actuacion) cu e lo tin cu siña di nan. Na final di e dia, e hoben lo ta den capacidad di presenta loke el a siña e dia ey.

            Esaki ta bay ta bao encargo di Jhon Freddy Montoya y un team completo pa loke ta trata su coordinadornan.

            Robert Maduro a remarca cu e hoben mester inscribi pa participa y tin lugar pa solamente 100 hoben. Pa cualkier informacion mester yama of pasa personalmente na Departamento di Cultura, ubica na e edificio di John F. Kennedy) pa yena e formulario di inscripcion.

            Carousel di Expresion lo tuma lugar diahuebs 28 di Juli proximo na Cas di Cultura.  Esaki ta completamente gratis, a enfatisa.

            Esaki tambe lo por bira un oportunidad pa e hobennan wordo conoci pa nan talento, a bisa.