CAO di 1 aña firma entre Hospital y empleadonan

The content originally appeared on: Diario

ORANJESTAD(AAN): Diamars atardi sindicato ABV y hospital a firma un acuerdo di protocol pa un CAO di 1 aña.

Gregory Croeze miembro di hunta di directiva di Hospital y Laboratorio a splica cu e CAO ta valido pa 2022.

El a splica cu e negociacionnan a cuminza fin di aña pasa y tabata basta intenso.

“Tur siman nos team di Hospital y esun di e sindicato a sinta na mesa pa delibera kico ta nifica e recortenan cu nos a haya riba nos presupuesto pa 2022 y pa yega na puntonan riba cual nos por a bay di acuerdo, pa loke ta kico si por y kico no por ainda e aña aki”, segun Croeze.

Croeze a gradici tur envolvi den e logro aki, mirando tambe cu negociacionnan no tur ora ta facil.

Presidente di ABV Gina Maduro di su banda a trece dilanti cu desde October di aña pasa ABV a cuminza cu negociacion pa miembro y empleadonan di hospital y FSLMA y Bloebank.

“Mi tin cu bisa cu prome biaha den historia pa sindicato ABV mester a negocia un CAO, unda cu e corte di 5.5% a pone cu no tabata un negociacion na un manera tradicional”.

Partidonan a purba wak con pa yega na un acuerdo, unda cu tabata wardando riba e desaroyonan cu tabata andando y a nota cu e recorte di 5.5% a sigui.

Esey a pone cu nos mester a ‘versober’ e CAO, segun Maduro.

El a sigui bisa cu ambos partido na mesa a demostra nan grandeza pa yega na un acuerdo, unda cu ta bay haci recorte si, pero na momentonan cu e ta haci menos dolor pa tur hende.

“Di otro banda e parti cu si ABV ta hopi contento cune ta e hecho cu e parti di pensioen porfin a bira 15% pa e trahadornan di hospital”, segun Maduro kende a gradici tur envolvi den e proceso.

Presidente di hunta di directiva  Jacco Vroegop tambe a hiba palabra y a gradici tur empleado pa nan aceptacion di e acuerdo.

“Den e temponan hopi dificil aki tur hende mester duna di nan banda y ta birando cada vez mas dificil mirando entre otro e inflacion riba e isla y tur tipo di otro problema, incluyendo cortamento di gasto den cuido cu Aruba a wordo obliga di haci”, segun Vroegop.

.