Caida of logro di Putin ta decisivo pa futuro di Venezuela

The content originally appeared on: Diario

DIARIO for di prome momento a mantene bista riba impacto regional — *Medidanan contra Putin ta expone poder capitalista di comunismo — *Maduro ta pidi companianan cu e debe placa asistencia contra medida

ORANJESTAD (AAN)- Na 2014 Vladimir Putin no a termina su intento di conkista di teritorionan cu mester a bira parti di un imperio Ruso nobo.

El a logra anexa Crimea. E medidanan cu mundo a impone na e momento, no a stroba su esfuersonan pa sigui colonialisa Europa y henter mundo cu e poder di placa.

Faltando tres aña pa e Revolucion Comunismo a celebra su “cien aña na poder), Putin a duna mundo prueba na 2014, cu mundo mester ta prepara pa sorpresa.

Awe e rikesa enorme di e grupo elitario di Vladimir Putin ta confirma cu tur hende no ta mescos na Rusia, caminda sumanan enorme ta figura tras di nomber di personanan poderoso di e pais.

E medidanan cu mundo a impone contra Rusia, ta habri wowo di mundo pa e realidad di poder financiero di Rusia, caminda tur hende sigur no ta mescos. Cu loke ta pasa na Ucraine, hasta prueba ta wordo duna cu bida di hende no bal nada den e sistema Comunista, cu ta un sistema di poder di placa.

Vladimir Putin a expone e cara berdadero di regimen Comunista, cu el a sirbi den KGB, e central di inteligencia, di espia y di militarnan profesional di Union Sovietico cu tabata e arma cu Union Sovietico a uza pa destrui hende cu para den caminda di Comunismo.

Caida of logro di Putin ta decisivo pa su aliadonan rond mundo y entre nan sigur ta figura, Nicolas Maduro.

Fracaso di Vladimir Putin por nifica final di e crisis na Venezuela, e satelite di Rusia cu no solamente ta depende di placa di Rusia, pero tambe di poder militar cu ta sostene Nicolas Maduro y infiltracion Ruso Comunista den industrianan Venezolano.

Cu asistencia di Rusia, Nicolas Maduro a trapa riba e sistema democratico na Venezuela y a keda na poder.

E medidanan cu Merca a tuma contra regimen Nicolas Maduro tabata tin impacto grandi cu Nicolas Maduro a logra vence cu asistencia di Rusia.

E situacion mundial actual ta genera problema pa Venezuela, cu tabata depende di asistencia Ruso mientras su economia di petroleo a yega suela pa motibo di e medidanan economico cu Merca a impone contra dictadura di Maduro.

Na e momentonan aki paisnan petrolero tin ganashi grandi debi na e prijs di petroleo cu ta subi pero Venezuela no por uza e oportunidad aki debi na e medidanan cu Merca a impone ora Union Europeo tambe a tuma medida contra Regimen Maduro, cu a keda den un conflicto abierto cu Union Europeo y den crisis total for di 2018.

Regimen di Nicolas Maduro a haci un apelacion riba companianan cu e debe placa pa pidi Merca deshaci di e medidanan contra Nicolas Maduro y su gobierno, cu Merca y hopi otro pais no ta reconoce como Gobierno.

Kico mester interpreta na e momentonan aki como Gobierno di Venezuela ta un pregunta serio ainda mientras Nicolas Maduro na tur forma, ta trata di mantene su mes cu aliadonan cu mundo liber ta considera “peligroso”.

“Putin por hala atras?” ta e pregunta grandi cu ta existi na Europa Oriental, centro di e conflicto mundial actual.

Sano juicio ta mustra cu Putin no por hala atras sin perde su cara completamente. Hunto cu Putin e realidad di Rusia, cu un grupo elitario financiero poderoso, ta deshaci di e pensamento cu comunismo kier a entrega mundo.

E crisis di Ucraine tin resultado grandi y desaroyonan mester wordo sigui cada momento.

Uno di e resultadonan directo di Ukraine por ta pa region di Caribe, cambio den e poder comunista pa motibo di e berdad comunista cu Putin a entrega.

Resultado cu e tin na e momentonan aki ta, cu satelitenan Ruso manera Nicolas Maduro y e gobiernonan di Nicaragua y Cuba, mester realisa kico lo ta nan futuro si Putin mester hala atras, loke lo por tin resultado directo pa Putin y su grupo na Rusia, a menos cu e grupo di Putin por impone un opresion total di Pueblo Ruso.