Buzonan ta buscando restonan mortal di tripulantenan na fondo den barco Arcangel Miguel

The content originally appeared on: Diario

ORANJESTAD (AAN): E barco di carga ‘Arcangel Miguel’ cu a sink riba Diasabra anochi 21 di Mei ora cu e tabata nabega di Aruba rumbo pa Santa Marta, Colombia, a wordo localiza den fondo di lama riba Diasabra cu a pasa.

   Nan a logra di haya sa exactamente unda e barco a bay finaliza na fondo, y awor nan ta spera cu e siman aki mes, buzonan Colombiano lo baha bay abao y bay listra den loke a resta di e barco pa check si por recupera e cadavernan di e seis tripulantenan cu no a drief riba lama.

   For di e anochi cu e barco a sink, famianan a keda inconsolable cu nan no por a haya e curpa di nan ser keri, y pesey tin e teoria cu nan lo a keda den nan camber of otro area ora cu e barco a sink debi na un ola grandi cu a dal e.

   Manera DIARIO a trece dilanti den un relato hopi extenso dos siman pasa, e unico persona cu a sobrevivi, esta Juan Carlos Sanchez a bisa cu den e scuridad el a logra di sali di e barco ta keda fula na e structura di e barco te ora cu el a haya un salida, y a keda flota.  E anochi ey e tabata koki abordo di e barco, y e ta indica cu ta un ola grandi a sorprende nan tur, y pone cu Arcangel Miguel a sink.  E barco ta 18 meter largo y seis meter hancho.

   E barco mes a sink dilanti costa di Puerto Estrella, na Alta Guajira na Colombia.  Esaki ta mas o menos 110 pa 130 kilometer pabao di Aruba.

   E suerte di Juan Carlos ta cu el a logra yega te na un boto salbabida, cu a habri cu aire y el a bay riba dje y a logra bay dilanti rumbo pa costa unda el a sigui dirigi su mes riba un luz di faro, y na final a wordo rescata pa algun piscador.

   Juan Carlos a bisa cu e ola a dal fuerte y a pone e barco kapseis.  Esey a pone e barco yena cu awa rapidamente na forma acelera, y finalmente el a sink cu velocidad rapido.

   E anochi ey, un sistema atmosferico di presion halto riba parti west di Caribe, for di 70º West te cu 77º West, tabata produci automaticamente lama hopi bruto.  Olanan tin biaha di riba di 8 pa 11 pia tabata wordo topa cune.  Y esaki ta e hipotesis di loke a wordo confronta riba lama.

   Unavez cu alarma a wordo bati, a core notifica Marina Colombiano, y tambe Guardacosta Colombiano cu a cuminza mobiliza pa e area.  Autoridadnan di Venezuela tambe a cuminza busca den e area, como cu 3 di esnan perdi ainda ta di estado Falcon.

   Juan Carlos Sanchez a declara na autoridad, cu ora e barco a sink, e no a mira ningun otro persona mas a logra salba nan mes.

   Esnan perdi ta Lino Alberto Gomez Galicia (1er oficial), Ledy Rafael Mata (co-piloto), Jose Antonio Salazar Malvar (hefe), Juan Carlos Sanchez Sanchez (bosun), y demas miembronan di tripulacion Jose Alberto Sanchez Nuñez, Andry Jose Narvaez Sanchez, y Jose Manuel Vizcaino Frontado.

   Riba e potret aki por mira un potret recien di Jose Antonio Salazar Malvar, kende ta procedente di Isla di Margarita. Su famia a emiti e potret aki pa mustra cu nan tambe ta spera cu pronto e por wordo localiza.

   Su yiu muher Shaila Salazar, a bisa cu e ultimo contacto cu nan tabatin cu e tata tabata e mesun Diasabra anochi ey banda di 7:00 pm ora e barco tabata moviendo.  El a bisa cu e ta bay drumi, pasobra mey anochi e lo subi warda.  Ningun rato el a bisa cu tin problema of algo similar cu e barco.

   Jose Manuel a bay traha riba e barco, como un forma pa gana salario y manda esaki pa su casa, como cu e ta sufri di malesa cronico di presion halto di curazon.  E tin seis yiu, y semper e tabata trata tur yiu na un forma corecto.  Tur dia e ta manda mensahenan di Whatsapp y Facebook pa e famia, cu mensahe tambe di fe y reflexion.

   Nan a hasta duna prensa potret di nan tata, cu tur hende ta yama ‘Papa Toño’ cu un picuda cu el a yega di gara riba e barco.