Buskeda masal den Boegoeroei ora hoben a casi mata un Polis cu auto

The content originally appeared on: Diario

Hoben awor ya ta encarcela

ORANJESTAD (AAN): Diasabra marduga algo serio a keda registra den distrito di Noord, cual acto inmediatamente a pone casi full Cuerpo Policial riba pia pa asina yuda den un investigacion.

   Tur cos a cuminza un poco despues di 2:35 am, ora cu un Polis Motoriza a para un Toyota Tercel color berde cu number A-34229 pa un control di trafico.  El a duna e chauffeur un señal pa para, y el a cumpli cune.

   El a para e vehiculo riba caminda grandi di Playa pa Noord, net otro banda di e rebendedor di Sherwin-Williams na Boegoeroei 85-D.  Polis a bay pa atende e chauffeur, cu el a reconoce como e hoben recidivista Jonathan K., un persona cu na numeroso ocasion a haya problema cu Polis y cu Husticia.

   Aki ta unda cu algo a bay bon, y e chauffeur dado momento a dicidi na primi trot, y esaki a ranca, lastra y dal e agente policial malamente, y a lage benta abao net dilanti Boegoeroei 26-A.  E auto mes a sigui core y desaparece.

   Mesora e yamada urgente a pasa via Tetra-Radio di Polis, unda a mira e gravedad di e oficial herida benta abao, kende tabata sclama di dolor.  Inmediatamente a pidi pa presencia di Ambulans, y mas unidad di polis pa bin duna un man.  Tambe a duna descripcion di e Toyota Tercel berde aki.

   Diferente unidad di Polis e momento ey a cuminza move pa area di Noord, Boegoeroei, Shaba, y Montaña pa yuda tira un bista.

   Polis tambe a cera e pida caminda aki pa asina haci un investigacion mas amplio.  Ora cu Paramediconan a yega, nan a bin nota cu e Polis tin basta trauma na su curpa, y ta parce cu su man a fractura.  Nan a logra stabiliza e agente, spalk su man, y asina a bay cune rumbo pa Hospital cu urgencia.

   Mientras tanto unidadnan di Polis cu ta coriendo rond, a bin haya e Toyota Tercel aki para como 140 meter mas leu for di unda el a laga e agente policial benta abao.  E Tercel tabata abandona y a djis lage atras blokeando garage di e cas Boegoeroei 22.  Pero e chauffeur a baha na awa.

   Polisnan a keda busca e ora den e parti ey di Boegoeroei, y tambe a pasa pa e otro banda di e residencia na Montaña pa check si por haye.  Pero e hoben lo a haya un bon lugar pa sconde.

   Mientras tanto Helicopter di Polis a lanta vuelo y a cuminza yuda den e buskeda ey rond tambe.

   Diripiente a bin descubri un revolver benta abao casi riba acera, net na e T-Kruising dilanti Berloni.  E revolver aki ta 41 meter leu for di e Tercel benta.  Pues kizas den e birada, e chauffeur a zwaai esaki for di su bentana di auto y e arma a djis cay eybao.  Djis imaginabo si Polis no a haya esaki, y den futuro cualkier mucha inocente bin topa cune, y bay hunga cu e arma.  Polisnan a confisca e revolver aki.

   Habitantenan di e area a bin pafo pa check kico ta pasando, y uno di nan cu tin Security Video Camera grabando, a bay check e video y por a mira con e chauffeur a ranca careda baha di e Tercel y a core bay y desaparece pariba.  E hecho cu e no por a core mas cu e Tercel, ta cu dos wiel tabata completamente flat.

   Mientras tanto na Hospital, esnan di Bureau Slachtofferhulp tambe a yega pa acompaña e agente policial.  Docternan a mira cu e fractura ta uno complica, y a opta pa busca specialista pa asina haci un operacion dentro di e proximo oranan mes pa atende esey.

   Aunke Helicopter tabata usa su luz potente pa ilumina e casnan y e areanan ey den marduga, Polis no por a localiza e hoben.

   Detencion den oranan di mainta:  Vocero Lito Lacle di Polis, a confirma Diasabra mainta cu e hoben Jonathan K. ta den man di autoridad!  El a bisa cu pa 9:55 am el a keda deteni na Warda di Polis na Noord.

   Jonathan K. di 25 aña di edad, ta naci na Aruba, y ta biba na Papaya.  El a haye hopi biaha envolvi den casonan serio, incluyendo uso di arma di candela.  El a wordo presenta dilanti Fiscal Auxiliar, kende a mira cu aki tin un caso grave di intento di asesinato riba un funcionario di ley, y pesey el a duna ordo mesora pa Jonathan keda encarcela pa wordo interoga.