Bringamento entre dos hoben abordo di Arubus tabata un acto hopi lamentael y tin consecuencia

The content originally appeared on: Diario

Liliana Rasmijn, Vocero Policial:


KPA ta para hunto cu Arubus pa evita e actonan aki 

ORANJESTAD (AAN) – Un situacion masha desagradable a sosode Diahuebs cu a pasa, abordo di un unidad di Arubus cu tabata biniendo di San Nicolas pa Playa, na momento cu un hoben a subi e bus yega bringa cu otro hoben cu tabata den e bus caba y a sigui un pelea formal entre e dos hobennan, unda cu e demas pasaheronan mester a presencia cu susto con tur dos a causa herida riba cara di otro, y laga e bus cu yen di sanger.

            Logicamente, e chofer mester a yama polis pa interveni, y otro bus a bin tuma e pasaheronan cu a haya nan mes den un  experiencia mahos, cu nan no por a kere loke nan a mira.

            Vocero Policial Liliana Rasmijn, den un entrevista cu DIARIO a lamenta hopi e acto aki entre e dos hobennan, y pesey KPA ta para hunto cu Arubus, cu ta transporte publico y cu tambe ta traha pa seguridad.

            Rasmijn a menciona cu nan ta traha hunto awo, pa evita e tipo di situacionnan aki. “Meneer Daou a splica hopi duidelijk caba kico ta e consecuencianan. Dus di nos parti nos ta para nan tras y tur loke ta bringamento y actonan contra ley, polis lo actua. Nan tin nos ‘blessing’ caba kico cu e chauffeur ta sinti cu e situacion ta bay for di man, nan ta yama Cuerpo Policial di biaha y nan lo tin patruya presente”, Rasmijn a declara.

            El a agrega cu Cuerpo Policial ta papia hopi cu e hobennan, ta duna hopi charla y ta acerca e hubentud bisa nan cual ta e consecuencianan ora nan ta haya nan mes involucra. “Pues, nos ta pasa semper prome cu scol caba polis ta pasando rond, pa evita y preveni.  Bo ta tende critica cu polis no ta core rond, pero polis si ta core rond pa  preveni cu actonan di violencia pasa. Danki Dios den e caso di bringamento, tabata tin un polis cerca cu a actua y aparta e personanan aki y kita nan di e bringamento”, Liliana Rasmijn a señala.