Boto di Piscado den problema a wordo lastra bek pa Rancho Carrion

The content originally appeared on: Diario

ORANJESTAD (AAN): Tabata Diasabra den dia, cu alarma a wordo bati na Rescue and Coordination Center (RCC) di Guardacosta, cu tin un boto piscado cu problema riba lama cerca di Aruba.

   Ta trata aki di e boto piscado Joandra cu tabatin problema cu su baterianan.

   RCC mesora a pone un unidad di Guardacosta di Caribe Hulandes su sede na Aruba, pa subi lama pa bay duna un man.  Esaki a wordo haci cu e speedboat special tipo Metal Shark, cu a move rapidamente den direccion di Joandra.

   Ora cu e Metal Shark a yega banda di Joandra, nan a check si tur hende abordo ta OK, y despues a duna asistencia door di tira un cabuya pa nan, y asina lastra e boto bek pa tera.

   Nan a bay direccion di Spaans Lagoen, unda e boto a bay mara na e Pier di Rancho Carrion.

   Na yegada na Rancho Carrion, e agentenan di Guardacosta a eherce un control rutinario riba e boto di piscado.

   Guardacosta ta avisa doñonan di boto pa haci mantencion regular na nan botonan. Pa nan propio seguridad abordo mester tin suficiente jacket di salbabida, un flashlight cu bateria y un pito, un EHBO kit, suficiente awa, aparato pa paga candela, VHF Marine Radio of un cellular full charged. Evita e chens di un accidente of situacion peligroso riba lama cu bo boto of Seadoo.

   Den caso cubo mester di yudanza bo por yama Guardacosta di Caribe Hulandes riba 913 of e Whatsapp number +(5999) 510-0913. Gosa di lama y beachnan na un manera safe.