Booshi Wever ta lamenta noticia falso relaciona cu su detencion na Venezuela

admin

ORANJESTAD    (AAN): Diaranzon a circula un informe indicando cu Booshi Wever, ex minister di Salud tabata sera. Esaki no ta berdad.

Booshi Wever berdad ta na Venezuela. El a bay algun dia pasa pa hiba un cadaver den un boto cu algun otro amistad. E persona haya na costa di Aruba sin bida tin algun siman caba den freezer. E famia no tabata tin manera pa hibe Venezuela. A prepara e papeleo via e funeraria Aurora y asina Booshi Wever a hibe cu algun amigo den nan boto.

E proceso pa hiba e cadaver a bay manera mester ta y Douane tambe a atende cu tur cos na waf prome cu salida. Ta un curpa sin documento. Na Venezuela autoridad a ricibi e yegada di e cadaver y nan a haci henter e control cu ta hopi estricto.

E famia tambe tabata warda riba e yegada di e boto cu a hiba e resto di nan ser keri bek Venezuela. Despues di keda cla, Booshi Wever y su compañante den boto a coy rumbo bek pa Aruba despues di algun dia.

Caminda pa Aruba den awanan di Venezuela a haya problema cu e motor di e boto. E propio Guarda Costa Venezolano a capta e señal di emergencia y asina nan a bin yuda. A yuda tow e boto hibe costa sano y salvo.

A cuminsa haci reparacion na e motor di e boto. Ta un speedboat cu motornan outboard. E mecanico mester a bin di Maracaibo pa asina atende cu e boto. Ainda e boto no ta cla.

A drenta den contacto cu Booshi Wever for di Diamars caba ora cu e rumor a cuminsa core cu e ta sera na Venezuela pa contrabanda di Gasolin. Diaranzon tambe e rumor tabata core atrobe.

Diaranzon un biaha mas a bolbe papia telefonicamente cu Booshi Wever y ademas a app cune na telefon. El a splica cu su famia tambe a yame puntre si e ta sera. E no tabata tin ningun problema cu autoridad. Unico cos ta cu el a hiba e restonan di un persona haya na costa y biniendo bek a haya problema cu boto. Un hende cu ta sera no por papia na Telefon.

Booshi Wever ta lamenta e tipo di noticianan falso cu ta wordo orkestra rond di dje. E potret aki ta saca diaranzon anochi despues di otro combersacion telefonico. Hasta un video nos tin di Booshi cu su dos amigonan cu tambe ta wordo menciona cu ta sera na Venezuela.

Booshi Wever a bisa cu e mes ta atende cu e hendenan cu ta circulando e noticia falso aki asina cu e yega Aruba.

 

 

Next Post

Certificado Hulandes como idioma stranhero pa alumnonan di VWO-6 di Colegio Arubano

ORANJESTAD (AAN): Tur e nuebe alumnonan di VWO-5 di Colegio Arubano, cu a haci e examen pa e Certificado  Hulandes como Idioma Stranhero (CNaVT) na mei 2017, a gradua. Esey ta un bon noticia pa e alumnonan! E certificado ta implica cu e alumnonan tin e capacidad pa sigui un […]