Bintiun hoben a finalisa exitosamente e edicion di Poder di Hubentud 2023

The content originally appeared on: Diario

ORANJESTAD (AAN):  Asociacion Trabao di Hubentud na Aruba a clausura e proyecto Poder di Hubentud cu un Award Night.

21 Hoben a finalisa Poder di Hubentud edicion ‘Nos Bida’ cu exito. E di 9 edicion ‘Nos Bida’ a consisti di dos categoria, Hoben 15-18 aña y Hoben cu limitacion intelectual. Richard Tromp (categoria 15-18 aña) y Stacey de Veer (categoria Hoben cu limitacion Intelectual) ta e ganadonan maximo di Poder di Hubentud 2023.

            Durante 2 luna y mei, 21 hoben a ricibi conocemento pa nan por crea un proyecto mientras nan a haya oportunidad pa forma nan mes como lider.

            Despues di a wordo nomina, e hobennan a campa 2 anochi. Aki nan a participa na diferente actividad di teambuilding, organisa un fiesta, hike, y mas. Na final di e campamento e grupo di hobennan a wordo parti den dos grupo. Nan a forma parti di e grupo di e tema cu nan a scoge, esta naturalesa y educacion.              Cada grupo a explora e area di nan tema. Grupo tema ‘Naturalesa’ a wordo guia na Parke Nacional Arikok. Aki e grupo a desaroya e inicio di nan proyecto “Make the Whole Island Move Challenge”. Grupo tema ‘Educacion’ a bishita Instituto Pedagogico Arubano pa explora e tereno di nan tema. Durante e prome encuentro nan a crea e proyecto “Pafo di Scol”.

            Tur hoben a reuni tur diasabra pa desaroya nan proyecto. Algun a reuni den siman demonstrando gran disciplina y enfoke pa logra nan proyecto cu exito.

            E aña aki e proyecto Poder di Hubentud a conoce 8 mentor cu a guia e hobennan cu feedback tocante nan presentacion durante algun encuentro.

Un grupo di hurado y expertonan a sa di dialoga cu e hobennan y evalua nan presentacion durante e evento di votacion. 

Resultado final Poder di Hubentud 2023.

            E resultado final a wordo anuncia durante e evento ‘Award Night’. 21 Hoben a ricibi nan certificado di participacion y un recuerdo. E hobennan aki ta Richard Tromp, Madison Williams, Montse Willems, Justin Wever, Shawndre Geerman, Disjonrick Jacobs, Stacey de Veer, Franjeska Connor, Randerly Trimon, Nathania Ridderstaat, Jezienne Ridderstaat, Maresha Tromp, Gilmard Jansen, Ashanti Richardson, Amelia Elskamp, Alyssa Bufalini, Robert Gibson, Ian Parejo, Ethan Parejo, Newton Sambo y David Greaux.

Banda di e dos ganado, algun hoben a ricibi un plakaat pa e area cu nan a destaca aden durante e encuentronan.

Justin Wever a sa di alegra e encuentronan pa medio di su personalidad y a ricibi e premio di ‘Spirito Alegre y Personalidad’.

Maresha Tromp a sa di destaca den su comunicacion y habilidad pa lidera. El a ricibi e premionan di ‘Aspiracion di Lidera & Habilidad di Vocifera’. Maresha a keda eligi como e hoben mas popular y a ricibi voucher di Dominos Pizza.

Montse a lidera e grupo tema educacion. El a sa di demostra habilidad di liderazgo den formacion y a ricibi e premio di ‘lider den formacion’.

Amelia Elskamp a vocifera su mes durante e eventonan y encuentronan na un forma hopi balansa. Amelia a ricibi e premio di Habilidad pa Vocifera.

Ian y Ethan Parejo a sa di ta disciplina, presente na tur encuentro y comunica bon. Ambos a ricibi e premio di ‘Disciplina & Comunicacion’.

Stacey de Veer y Shawndre Geerman tabata e artistanan creativo durante e proyecto. Nan a crea e flyer pa ambos proyecto y a co-crea e logo di e proyectonan. Cu nan dibuho e patron di tela a wordo crea. Nan proyecto ‘Pattern Design’ ta encera cu nan patron lo wordo geprint ariba e tela. Esaki lo wordo uza pa crea un liña di paña cu lo wordo estrena durante un show di modelahe. Ambos hoben a ricibi e premio di ‘Creatividad’ y Stacey a ricibi un titulo adicionan di ‘Comunicacion. Durante e tayer di ‘Pitch’ Stacey tabata e unico den tur hoben cu a comprende y haci e tarea bon.

Jezienne Ridderstaat a ricibi e premio di Aporte y responsabilidad como cu el a sa di carga su responsabilidad cu maximo dedicacion y disciplina.

Randerly Trimon su dedicacion extra door di a reuni cu su Excelencia Sr. Arends, forma parti di e promovideo di su grupo y reuni cu managers di Ecotech y su aporte na e grupo a resulta den su premio di ‘Aporte y Superacion’.

Disjondrick Jacobs ta un cu a sa di sigui demostra cu su limitacion di ta den rolstoel no ta limite di logra den bida. Su inspiracion pa tur a haci cu el a keda cu e premio di ‘Go Getter’.

            E proyecto di e hobennan cu a resalta mas pa medio di nan documento, presentacion y trabou den ekipo tabata di grupo tema ‘Naturalesa’ titula ‘Make the Whole Island Move Challenge’. Esaki a wordo lidera door di e hoben ganador cu a sa di demostra maximo disciplina, dedicacion, pasenshi, ambicion, liderazgo y comunicacion, Richard Tromp. E grupo ta consisti di Richard Tromp, Randerly Trimon, Robert Gibson, Justin Wever, Newton Sambo, Ian Parejo Stacey de Ver, Shawndre Geerman, Franjeska Connor, Jezienne Ridderstaat, Nathania Ridderstaat y Madison Williams.

Tur tres proyecto lo ser ehecuta na aña 2024.

            Poder di Hubentud 2023 a ser realisa danki na e comision cu a consisti di Carlos Buera, Madeleine Thijsen, Jhon Freddy Montoya, DCA, Alberto Groeneveld hunto cu Directiva y Director di Asociacion Trabao di Hubentud na Aruba.