Bestaansminimum pa un famia durante luna di Juni a subi cu 300 Florin

The content originally appeared on: Diario

Algo alarmante sigur!

ORANJESTAD (AAN): Oficina Central di Estadistica a emiti nan boletin pa cu e analisis di Indice di Prijs di Consumo (conoci como CPI) pa luna di Juni 2022.

   Manera ta di spera, e CPI pa luna di Juni 2022 ta 103.26, loke ta representa un subida di 0.7% compara cu e indice di Mei 2022 (102.49) y acumulando un subida di 2.6% te cu na Juni di e aña aki.

   E cambio di e CPI pa e ultimo diesdos (12) lunanan (Juni 2021 te cu Juni 2022) ta 5.3%, un subida di 4.3 punto di porcentahe (ppt) compara cu e periodo corespondiente di aña pasa (1.0%).

   E promedio anual (ultimo 24 luna) di e tasa di inflacion pa e periodonan di Juni 2020 te cu Juni 2021 y Juni 2021 te cu Juni 2022 ta 3.4%, un subida di 5.2 ppt compara cu e -1.8% registra den e periodonan di Juni 2019 te cu Juni 2020 y Juni 2020 te cu Juni 2021.

   Durante e luna aki, 7 di e diesdos sectornan a registra subida di prijs. E subidanan cu tabata tin e mayor efecto riba e CPI a worde registra pa e sectornan di “Transporte ” (4.5%), “Mobilario” (2.6%) y “Cuminda y bebida no-alcoholico” (1.2%), causando un efecto di 0.67, 0.24 y 0.13 ppt, respectivamente. E subidanan den e sectornan restante a contribui cu un efecto di 0.10 ppt riba e CPI di Juni 2022.

   E subidanan aki a worde contraresta parcialmente door di principalmente caida den e indicenan di e sectornan di “Paña y zapato” (-7.3%) y “Recreaccion y cultura” (-1.6%) cu a contribui cu un efecto di respectivamente -0.19 y -0.15 ppt riba e CPI di Juni 2022. E caidanan den e sectornan restante a contribui cu un efecto di -0.05 ppt riba e CPI di Juni 2022.

   E subida den e sector di “Transporte” a worde causa door di principalmente un subida den e categoria “Gasto relaciona cu uso di vehiculo di transporte personal” (6.9%), causando un efecto di 0.65 ppt. E subida den e sector di “Mobilario” a worde causa principalmente door di un subida di 14.2% den e categoria “Mueble y accesorionan, tapijt y otro tipo di material pa vloer”, causando un efecto di 0.14 ppt. E subida den e sector di “Cuminda y bebida no-alcoholico” a worde causa door di principalmente un subida den e categoria “Cuminda” (1.2%), causando un efecto di 0.12 ppt.

   E caida den e sector di “Paña y zapato” a worde causa principalmente door di un caida den e categoria “Paña” (-7.2%), causando un efecto di -0.15 ppt. E caida den e sector di “Recreacion y cultura” a worde causa principalmente door di un caida di 2.8% den e categoria “Vacacion”, causando un efecto di -0.08 ppt.

   Canasta di consumo: E canasta di consumo di e CPI ta consisti di 408 bienes y servicionan.

   Compara cu luna di Mei 2022, 44.4% di e bienes y servicionan aki a conoce un aumento di prijs causando un efecto di 1.40 ppt, mientras cu 39.5% ta mustra un caida di prijs, cu a contribui cu un efecto di -0.65 ppt y pa e restante 16.2% no tabata tin cambio den prijs.

   Prijsnan di bienes a subi cu 1.3% y a causa un efecto di 0.75 ppt. Prijsnan di servicionan practicamente no a registra cambio y tabata tin un efecto insignificante riba CPI di Juni 2022.

   Core inflation: E asina yama CPIC (core inflation) – CPI excluyendo e efecto di energia y cuminda – a registra na Juni 2022 un subida di 2.0%.

   E indice di energia, cu ta consisti di e productonan: electricidad, awa, gasolin y diesel a registra un subida di 9.0%. E indice di cuminda a registra un subida di 5.1%.

   Bestaansminimum: Algo espantoso sigur ta e hecho cu e minimo di placa cu un famia mester pa por biba den un luna di tempo, a subi bastante.

   Segun Oficina Central di Estadistica, e bestaansminimum pa un hogar consistiendo di 2 adulto y dos mucha (edad 0-14 aña) na Juni 2022 ta 5.070 Florin.

   Esey ta un subida di 300 Florin compara cu Juni 2021.  E tempo aya e tabata na 4.770 Florin.

   Ademas di esey, Oficina Central di Estadistica a mustra cu e Bestaansminimum pa un hogar di 1 adulto ta 2.414 Florin, esey ta un subida di 143 Florin compara cu Juni 2021 (ora e tabata 2.271 Florin).