Benta di parti di propiedad di refineria ta trece por lo menos 60 miyon pa Pais Aruba

admin

Benta di parti di propiedad di refineria ta trece por lo menos 60 miyon pa Pais ArubaORANJESTAD   (AAN): Un di e propiedadnan di e refineria cu Pais Aruba lo ricibi ora cu Valero bay for di Aruba, si e acuerdo cu CITGO cristalisa, ta e servicio di benta di gasolin y stacionnan di gasolin cu actualmente ta propiedad di Valero.

Di biaha e decision a cay den gobierno pa bende e propiedad aki. Prome Minister Mike Eman a bisa den un entrevista diaranson cu gobierno di Aruba a pidi Utilities Aruba N.V. pa cuminsa mira e mercado pa un cumprado potencial pa e propiedad cu tin un balor di 60 miyon Florin.

E benta di e propiedad aki lo trece 60 miyon Florin pa caha di Pais Aruba, segun Eman. Los di e refineria esaki ta un entrada adicional pa 2016 cu no ta inclui den Presupuesto 2015 cu lo tin un impacto grandi.

E contract di lease cu CITGO lo trece aden tambe sumanan substancial, y lo tin entradanan di impuesto cual ta worde poni na un minimal tambe den e acuerdo cu CITGO, el a agrega.

Prome Minister Eman ta splica cu gobierno ta premira cu lo tin un entrada adicional di 50 miyon Florin den caha pa medio di accionnan di reorganizacion na departamente di impuesto.

CAFT a puntra pa substancia e suma aki, pero, segun Eman, Aruba tin hopi otro entradanan potencial pa 2016 cu ta sobrepasa e suma di 50 miyon, relaciona cu un “definite agreement” cu CITGO pa cu e refineria, y esaki a haci posibel cu e tratamento di Presupuesto 2016 por a worde hala pa januari.

E mandatario a bisa cu mester calcula e impacto di un acuerdo cu CITGO den e presupuesto ainda. Aruba lo haya tur propiedad di e refineria for di Valero.

E reapertura di e refineria sin mas lo tin un impacto enorme, no di 50 miyon, pero riba di 100 miyon Florin cu e benta di cierto assets cu ta bira di Aruba, cual atrobe tin un impacto adicional positivo riba presupuesto di Aruba, Eman a splica.

Di otro banda, si e refineria no conoce un reapertura, Eman a remarca, definitivamente e recapacitacion di e area y redestinacion di e area, incluyendo e limpiesa cu Valero mester haci di e tereno lo tin su impacto.

Tur cos ta indica cu den e siguiente simannan lo mester bin un acuerdo pa e reapertura, cual lo worde manda tambe parlamento, el a agrega. Lo tin un nota van wijziging añadi na e presupuesto pa e minister di finansa.

Prome Minister Mike Eman a expresa cu e ta hopi orguyoso como cu masha poco gobierno por bisa cu nan ta alcansa nan meta den e termino di nan gobiernacion. Aruba ta logrando tanto den e parti financiero como e parti economico, y tin un perspectiva positivo pa futuro.

Entretanto CITGO a acorda cu si nan tuma e refineria nan lo opera e sistema riba gas y lo bin un proyecto di algae pa e parti cu ainda tin emision di CO2.

 

Next Post

Bufete di Abogado Croes Wever & Tchong a demanda Aruba

ORANJESTAD (AAN) – Riba e website Advocatie a keda publica un caso legal unda cu e Bufete di Abogado Croes Wever & Tchong a demanda pais Aruba pa e suma di 600 mil Florin debi na facturanan cu no a worde paga. Esaki ta facturanan cu ta data di e […]