Benny no mester duna cuenta na Speed cu Patrick Paskel sino dilanti mesa berde

The content originally appeared on: Diario

ORANJESTAD (AAN): Parlamentario Endy Croes a tuma nota di un media show cu un website local hunto cu Speed y Patrick Paskel kier monta bao di e nomber “Cara Cara”.

   Segun Croes, kizas nan mester a ahusta e nomber pa “Cara Cara pa Santo Patia”!

   Aki e dos tiponan cu a strica mas di 8 miyon Florin di pueblo bao di e gobierno anterior, esta Speed y Patrick Paskel kier haci un show pa brinda Benny e oportunidad di “plè” inocente.  Nan kier logra dos cos. Uno balansa e criticanan fuerte di corupcion contra AVP al momento y alaves nan kier purba atravez di laga Benny papia e purba defende su mes publicamente.

   Ningun di dos obhetivo lo worde logra ni cuanto programa nan bin cune. Benny ta sospechoso di husticia pa 5 encargo criminal hopi pisa entre otro falsificacion, soborno, maluso di poder, labamento di placa, djis pa nombra algun.  Tur personanan cu tabata den e “clan” di Benny lo worde interoga y hopi a cuminsa cay sera.

   Mesun modus operandi cu Leoncita Arends di e emisora local tabata usa den tempo di su Gloria. Bay radio habri microfono pa laga pueblo lastra MEP y asina kita tur atencion di pueblo pa Leoncita cu ayudo y cooperacion di Benny masacra terenonan di e pueblo aki pa yena nan cartera.

    Email nan di Leoncita:

   Segun Croes, e emailnan di Leoncita pa hefe di oficina di Benny tabata papia cla!  Benny bao di ‘willens en weten’ tabata malusa su poder pa complace un grupo privilegia cu tabata pidi tereno, haya tereno door di Benny pero al mismo momento tabata tin un cumprador caba en espera y aki Benny ta bolbe coopera pa permiti e transferencia di shares di e NV cu e mes a duna e tereno pa enrikece su amigo- y amiganan di cas. Asina por corda e email (cu a worde publica caba den Leoncita Leaks) unda Fredric Every (Chief of Staf) di oficina di Benny ta manda informa Leoncita cu lot nummer 143, 144, 145 y 156 na Barcadera cada un ta 5.000m2 ta cla. Textualmente e email ta redacta: “Mi a bisa Benny y Franklin pa wanta #143 pa bo”.  Lagami sa si ta bon, y cuminsa cu traha bo carta y haci un peticion oficial na DIP.”   Pues Chief of Staf di e Real Estate di tereno den Cocolishi tabata manda emailnan asina pa Leoncita. Asina e wega aki tabata worde hunga. Awe Benny kier bin yora den Cara Cara hunto cu Speed y Patrick cu e ta santo? Santo pero na Santo Patia!

   Segun Croes, no ta den Cara Cara bo mester defende bo mes pero dilanti Mesa Berde!  No ta dilanti Speed cu Patrick bo mester defende bo mes, sino dilanti mesa berde. Speed cu Patrick a cobra 8 miyon cerca bo propio gobierno, mas 600 mil na Utilities Aruba NV, 500 mil na RDA (sin contract) pues ta mas cu claro nan ta defende bo pa asina crea e oportunidad pa sigui ranca placa di pueblo den futuro.

   Pa e motibo aki AVP no por bin back. Mucho carpata kier colga riba lomba di baca pa chica pueblo inocente. Envez di perde bo tempo Benny den programanan publico cu dos otro atracador di pueblo, mihor bo prepara bo mes pa defende bo peyeho dilanti Hues.  Cara Cara pa Santo Patia.