BDO-WTS a bira un combinacion perfecto y lo tin celebracion awe Diamars atardi

admin

ORANJESTAD (AAN): Dialuna 8 di mei 2017 a tuma lugar e acto ceremonial di firmamento entre WTS y BDO International.

Pa WTS tabata presente Señora Cari Wolter, Sr. Frank Snijders y Sr. Jamil Tromp y BDO International a worde representa door di Sr. Martin van Roekel, CEO. Tambe Sr. Jeannot Evers Partner den accountancy di BDO Hulanda a acompaña nan pa e ocacion.

Durante e ceremonia Señora Cari Wolter ta splica cu den e ultimo 10 añanan, WTS a crece y transforma su mes den un di e companianan mas dinamico y renombra den e ramo di “belasting, accountany & advisory” na Aruba. Esaki ta danki na tur nos cliente nan pa e gran apoyo y confianza deposita den nos, y e dedicacion continuo di nos coleganan. Pa cual motibo nos ta supremamente agradeci.

“Den un mundo asina dinamico y cu tanto cambio, y den cual desaroyo nan riba mercado local y internacional ta tuma lugar asina liher, a pone nos evalua nos strategia di compania. Un evaluacion cu meta principal pa hiba nos na e siguiente fase di evolucion di nos organizacion pa sigui garantisa mihor servicio. Ta pa e motibo aki y cu inmenso placer y honor nos ta anuncia cu WTS a haya e licencia exclusivo pa opera como BDO na Aruba ” asina Señora Cari Wolter a enfatisa.

BDO mundialmente ta den e top compania nan mas grandi den e ramo di “belasting, advisory & accountancy”. BDO tin presencia den 158 pais y un staff di 67.700 profesional dedica trahando den mas cu 1.400 oficinanan rond mundo.

“BDO ta conoci pa su enfoke personal pa cu empresanan chikito y mediano. BDO no ta impone reglanan riba nan miembro nan, nos strategia ta pa respeta e cultura local di maneho di negoshi den cada pais y pa stimula e partnernan pa tuma decision strategico basa riba merito specifico di e mercado local”, asina Sr. Martin van Roekel a remarca.

Pa es motibonan aki WTS a tuma e decision di uni forza cu BDO, combinando di e forma aki “lo mihor di dos mundo” pa ofrece Aruba y tur cliente di WTS e miho experiencia den servicio.

Sr. Jamil Tromp ta elabora: “ Nos ta firmemente convenci cu BDO pa nos ta un paso esencial pa ofrece mas innovacion y eficiencia cu servicio di calidad superior pa nos clientenan y manteniendo nos toke personal pa cual WTS a resalta semper riba mercado, dunando servicio de calidad halto. E dedicacion y compromiso cu WTS ta conoci pe cerca su cliente nan lo keda manteni” asina el a conclui.

WTS a “rebrand” recientemente den BDO-WTS y ta celebra e acto aki, awe Diamars atardi  9 di mei. E celebracion aki lo ta conhunto cu coleganan, clientela y otro invitadonan.   Gobernador di Aruba Sr. Alfonso Boekhoudt lo honra BDO-WTS cu su presencia y alavez lo inaugura oficialmente e edificio nobo situa na L.G Smith Boulevard #26. Un edificio iconico, historico den Oranjestad modernisa y renova di un forma “Eco friendly”, unda su interior ta decora cu “artwork” di Aruba su fauna, flora y edificio nan monumental y historico.

DIARIO a compronde, cu en conexion cu apertura di e edificio nobo, e caminda lo ta bay ta cera Diamars 9 di Mei for di e  crusada di Adriaan Lacle Boulevard te na e crusada di Schumannstraat di 3:00 pm te cu 11:00 pm.

Riba potret por mira d.r.p.d. Mr. Frank Snijders, Mr Martin van Roekel (BDO International), Sra. Cari Wolter, Mr. Jamil Tromp y Mr. Jeannot Evers RA (BDO Nederland)

Next Post

Presonan lo ta menos agita ora di usa busnan di CEA

ORANJESTAD (AAN): Dialuna mainta na Cuerpo Especial Arubano (CEA) a ricibi algun auto nobo pa asina nan por sigui haci nan trabao. E busnan a bin di Hulanda y Aruba tin un cooperacion cu Dienstvervoer en transport na Hulanda. E departamento aki ta parecido na CEA, pero e unico cos […]