Baron grandi di droga Piet Wortel a wordo gara na Aruba

The content originally appeared on: Diario

*Conocido criminal Hulandes-Surinameño tin 53 aña di edad  — *Noticia di su detencion a plama mesora rond mundo

ORANJESTAD (AAN): Medionan Hulandes di prensa a reporta Diahuebs cu conocido traficante di droga, e Hulandes-Surinameño Piet Wortel a wordo deteni Diaranzon na Aruba.

   E criminal di 53 aña lo wordo extradita mas pronto posibel pa Hulanda, unda cu e tin un castigo pa sinta ainda relaciona cu un caso bieu di droga.

   Piet Siegfried Wortel ta wordo mira como un traficante importante di droga, kende constantemente tabata manda cantidadnan grandi di cocaina pa entre otro Hulanda, unda cu criminalnan Hulandes tabata ricibi y sigui transporta e droga aki.

   Wortel a wordo deteni despues di un investigacion intenso di Landelijke Recherche, via di fiscalnan liaison.

Ministerio Publico no a confirma e detencion, pero nan no ta nenga cu esaki a tuma lugar.

   Na 2014 Wortel a wordo condena na Hulanda pa sinta un castigo di 7 aña, pa traficacion di droga na gran escala.

Esaki despues cu el a wordo deteni na Spaña na 2012. E tempo ey Ministerio Publico a exigi un castigo di 9 aña, pero el a logra scapa.

   Desde e tempo ey e tabata keda mas tanto na Suriname.

   E baron di droga Wortel a wordo menciona como un di esnan responsabel pa manda e partido di 4.200 kilo di cocaina cu a wordo intercepta den un deposito na Antwerpen na 2020.

   Su detencion e siman aki na Aruba, a bira noticia specialmente cerca prensa na Europa.