“Ban concientiza nos mes riba e importancia cu archivo tin”

The content originally appeared on: Diario

Minister Xiomara Maduro:

ORANJESTAD (AAN) – Minister di Finanzas y Cultura Xiomara Maduro, den conferencia di prensa cu a tuma lugar na Archivo Nacional, Diaranzon, a expresa palabra di gradicimento na e escritor y historiador Dufi Kock, cu a deposita su confianza den Archivo Nacional, pa trece tur su legado di documentacion historico, buki, artefacto di guera, pa e wordo conserva pa ANA, y e publico tin mas acceso na su material. E mandatario a bisa cu Dufi Kock no kier riesga di perde su material historico na cas, pasobra esey tambe por pasa.

E mandatario a gradici ANA y tur esnan cu lo ta envolvi den e evento di concientizacion, cu ta pa e pueblo bin hunto y celebra e Dia Internacional di Archivo y e Siman di Archivo. Ta bay tin un “open dag” pero tambe un temporada unda por entrega in formacion na ANA. E dignatario a bisa cu nan kier haci uso di e campaña aki, pa asina concientiza cada un ciudadano na Aruba, manera a wordo mustra den un video cu a wordo pasa den e conferencia di prensa.

El a subraya cu e concientizacion aki (pa trece documentacion historico y artefactonan na ANA) no ta dirigi solamente na esnan grandi, pero na e hobennan tambe, pa nan ta conciente di e importancia cu tin pa entrega documentacion, potretnan bieu cu tin den cas, y no tira nan afo, pasobra esey ta tira afo nos memoria.

Minister Maduro a gradici henter e team di ANA pa e bunita proyecto aki y e ta sigur cu tur hende ta bay percura pa trece algo pa entrega na ANA.

“Ban concientiza nos mes riba e importancia cu Archivo tin, no solamente pa gobernacion, pero sigur e bienestar di pueblo y pa e memoria di nos pais. E ta forma parti di nos rikeza cultural y pesey, ban  nos tur aporta na esaki”, Minister Xiomara Maduro a señala.