Aworaki, Wardacosta ta para riba 4 mil kilo di droga

The content originally appeared on: Diario

Vocero di Wardacosta, Shalick Clements:

ORANJESTAD (AAN) – Den conferencia di prensa, e Vocero di Wardacosta Caribe Hulandes, Shalick Clement, a duna un relato tocante e casonan di botonan cu material ilegal, detecta den e vecindario di awanan teritorial di Aruba.

CASONAN JULI 2022:

Por saca afo di e cifranan duna pa e vocero, cu di 16 pa 27 di Juli, Wardacosta a intercepta 900 kilo di cocaina y 1 kilo di marihuana.

16 Juli: Wardacosta a detene e boto Casandra cu tambe ta local unda a haya dos hende homber local, cu un cantidad chikito di droga, cu tabata mas of menos dos kilo.

22 Juli: Wardacosta a haya su mes cu un caso unda a haya un cantidad mas grandi di droga, cu tabata mas of menos 400 kilo di cocaina, unda tabata tin cinco hende homber, di cual un Venezolano, un Dominicano y un Colombiano, tabata tin abordo diferente bulto di droga.

26 di Juli: Wardacosta a detene otro boto local, cu dos hende homber unda cu a wordo haya mas of menos 40 kilo di cocaina abordo y un kilo di marihuana. Conhuntamente cu e partnernan di e cadena hudicial, a atende cu e caso aki.

27 di Juli: Wardacosta a haya un Gofast,  cu tres hende homber riba dje, transportando 460 kilo di cocaina.

TRAFICACION DI HENDE:

30 di Juli: Pa ultimo, e seis botonan cu el a menciona, a wordo haya dia 30 di Juli unda a detene un boto den area di Baby Beach, yama “Nuestra primera vez” unda a detene e capitan y a traslad’e pa Unidad di traficacion di hende. E capitan ta ser sospecha di mensensmokkel, y e siete personanan cu tabata transporta a wordo traslada pa Warda Nos Costa.

            “Manera nos a indica, pues diferente boto local y hende local, cu tambe nos ta mirando den e ultimo simannan y lunanan cu a pasa, cu nan ta traha conhuntamente of nan mes ta haci e transporte.

Nos a haci tur e trabaonan aki, hopi bon trabao, cu cooperacion di nos partnernan cu ta OM, KPA, Warda Nos Costa, Douane, Imigracion y KIA, y nan diferente unidadnan.

            Nos tin tambe, banda di e trabao cu nos a haci via e Punto di Sosten di Aruba, algun transporte cu a tuma lugar den e area di Curacao, y nos a haci esaki hunto cu, entre otro e barco di marina, cu ta Groningen, cu ta navegando e Islanan ABC (Aruba, Bonaire y Curacao) y akinan tambe nos a logra intercepta bastante boto y nos a saca un comunicado manera prensa por a mira siman pasa, unda nos a indica cu aworaki Wardacosta ta para riba 4 mil kilo di droga di cual hopi ta cocaina.

            Ayera tambe nos a canta bingo, caminda cu nos a haci un detencion riba un Gofast unda nos a haya bastante kilo di droga. Kiermen e 4 mil kilo ta bay subi. Mi no por indica ainda e cantidad, pero nos a haya bastante bulto y esaki tambe ta algo grandi cu nos a logra intercepta y kita droga for di cayanan, e islanan y paisnan pa evita cu e por wordo malusa”, señora Clement a indica.

            Pa conclui el a indica cu e agentenan di Kustwacht tambe ta navegando hunto cu e barco Groningen cu ta navega pa Wardacosta, kiermen e ta un unidad di dje na e momentonan aki, pero na momento cu e ta navega pa Marina of otro di e partnernan e no ta di Wardacosta mas, pero tur loke Groningen ta intercepta ta cay bao di Wardacosta.

galleryAworaki, Wardacosta ta para riba 4 mil kilo di droga/gallery