Awo por inverti mas den deporte y stimula un comunidad sano y activo

The content originally appeared on: Diario

Parlamentario Darlaine Guedez-Erasmus (MEP):

ORANJESTAD (AAN):  Durante un conferencia di prensa dialuna mainta 18 juli, Minister Endy Croes a anuncia cu despues di un negociacion cu hopi esfuerso a logra renegocia e contracto desfaborabel pa nos deportistanan cu Fundacion Lotto pa Deporte tabata tin cu Canadian Bank Note y transforma esaki den un contracto hopi mas husto unda berdaderamente tin espacio pa inverti den deporte.

            Gobierno na aña 2011 a firma un contracto cu Canadian Bank Note y a traspasa e operacion den su totalidad pa Canada. Desde 2011 – 2020 Canadian Bank Note a logra haya 104 miyon di ganashi y Lotto Pa Deporte a logra haya 34 miyon so. E sistema aki ta hopi desproporcional no ta apropia si nos kier inverti mas den deporte y stimula un comunidad sano y activo.

            Logrando e transformacion di e contrato cu por cierto a sosode den bon termino cu Canadian Bank Notes Minister Endy Croes y henter team cu a traha duro a logra esaki ta sigura cu den un period di 2 aña sigur lo por tin mas fondo disponibel pa tur ciudadano na Aruba cu kier participa na deporte. Principalmente, tur nos hobennan por participa sin mira su situacion financiero. Pero e oportunidad cu e lo ricibi pa desaroya su talento. Awo ta trahando pa dentro di 3 luna firma un contracto husto y cu asina por crea fondo pa e mundo di deporte.

            “Mi kier felicita gobierno di Aruba y Minister Endy Croes pa su determinacion, pa asina kibra e contracto aki y trece solucion pa e mundo di deporte cu ta un aspecto hopi importante den e desaroyo di e hobennan y den bida di tur persona den nos comunidad”, Darlaine Guedez-Erasmus a expresa .