Awe ta Dia Mundial di Meteorologia cu e tema: Na vanguardia di e accion pa e clima”

The content originally appeared on: Diario

Pabien na Aruba su Servicio Meteorologico:

ORANJESTAD (AAN) — Awe, Diasabra 23 di Maart 2024, ta wordo observa e Dia Mundial di Meteorologia, cu tema interesante: “Na vanguardia di e accion pa e clima”.

Manera tur hende ta conciente di dje, awendia, e cambio climatico ta un berdadero menaza real y innegable, pa henter nos civilizacion. Su efectonan ta patente caba y lo bira catastrofico si nos no ta actua mesora.

Asina e Organizacion Mundial di Meteorologia (OMM) ta resalta, den su publicacion dedica na e Dia Mundial di Meteorologia awe.

OMM ta indica cu e Obhetivo di e Desaroyo Sostenible ta exhorta pa adopta medidanan urgente pa combati e cambio climatico y su efectonan. “E progreso den e obhetivo aki ta fundamental pa avanza den e logro di tur e demas Metanan di e Desaroyo Sostenible”.

E trabao den e comunidad di OMM ta indispensable pa adopta medidanan relaciona cu e clima y alcanza e Metanan di e Desaroyo Sostenible den tur area. Ta trata aki di un labor di enorme importancia social, ya cu e ta contribui na reduci hamber y pobreza; mehora e salud y bienestar; garantiza awa limpi y energia accesible y no contaminante; proteha e bida submarino y e bida di e ecosistemanan terestre; y logra ciudadnan y comunidadnan  mas resiliente na e cambio climatico.

OMM ta sigui bisa cu e prediccionnan climatico y meteorologico ta yuda impulsa e produccion alimenticio y ta trece e mundo mas cerca di cero hamber!

“E integracion di epidemiologia y informacion climatico ta yuda compronde y gestiona e malesanan sensible na clima. Asina tambe, e sistemanan di alerta trempan ta contribui na reduci e pobreza pasobra nan ta duna e poblacion, e oportunidad di prepara su mes y limita e impacto di e fenomenonan meteorologico extremo.

“OMM, su miembronan y asocia ta impulsa e ciclo di valor completo for di e ciencia te e servicio y medidanan na beneficio di e sociedad. Nos ta promove e conocimento di e sistema Tera, monitorea e estado di e clima y su recursonan hydric, ta provee informacion cientifico pa propicia e reduccion di emisionnan di gas y di e efecto invernadero, brinda servicio climatico y ta emiti alerta trempan pa faborece e adaptacion na e clima”, OMM ta splica.

E Ciencia ta esencial pa haya solucionnan y e por acelera e logro di e Metanan di e Desaroyo Sostenible, den tur area. OMM ta uni den e ciencia.

“OMM lo sigui na vanguardia di e accion pa e clima den e caminda cu nos a emprende pa e cooperacion y innovacion, probechando e experiencia colectivo pa supera e dificultadnan y realiza nos vision comparti di un mundo mas sigur y resiliente pa e generacionnan futuro”. Asina OMM ta conclui su relato.

Pabien na nos Meteorologonan, deseando nan hopi sabiduria y forza den e trabao interesante, valioso y indispensable cu nan ta desplega.