Awe por cuminsa paga number di auto pa aña 2017

admin

62 % di doñonan di auto no a paga number completo 2016

Awe por cuminsa paga number di auto pa aña 20171
Awe por cuminsa paga number di auto pa aña 20172

ORANJESTAD (AAN): Durante un conferencia di prensa, vocero di Departamento di Impuesto, Sra. Meverly Romano a splica cu cuminsando riba dia 6 di December por paga number di auto pa aña 2017.

Sra. Romano a bisa cu lo sigui uza plachi di number di auto di aña 2015, pero e sticker lo cambia di color, e biaha aki ta cora pa esnan cu ta paga pa kwartaal, y blauw pa esnan cu ta paga full e aña.

E vocero a indica cu luna di December a cuminsa y esaki ta cuminsamento di un aña fiscal nobo. Aña 2017 lo sigui uza mesun plachi di number di 2015, colornan blauw cu blanco. Kiermen esaki no ta cambia e aña aki, sistema di sticker cu a wordo lanza e aña aki tambe a keda mescos, pero apenas cu e colornan ta cambia.

Chofernan por cumpra dos tipo di sticker; un rondo y un cuadra. Autonan cu tin un plachi di number A, of un plachi personaliza, ta haya un sticker rondo y e otronan cu no ta tipo A, lo haya un sticker cuadra.

Algo hopi importante pa nota ta cu esnan cu no a paga aña 2015 y 2016 no por paga number di auto pa aña 2017, kiermen chofernan mester tin tur pago na ordo pa cumpra nan number di auto pa otro aña. E motibo di esaki ta cu por lo menos 38 porciento di numbernan registra a paga aña 2016.

Departamento di Impuesto a revela e cifranan, y nan no ta contento cu resultado. Pa loke ta trata aña 2016, actualmente tin 74.440 number registra den diferente categoria. Di e cantidad aki, tin un total di 46.058 number cu no a paga completamente. Kiermen no a paga full aña of a paga solamente prome kwartaal of mitar aña. Normalmente den luna di December, tur chofer mester tin nan number di auto pa 2016 completamente paga.

Sra. Romano a indica cu e cifra di 46.058 ta representa un 62 porciento di number cu no a paga manera debe ser. Loke ta nifica cu solamente un 38 porciento a cumpli cu nan deber. E ta considera esaki un falta di respet pa nos leynan y tambe un falta di respet na esnan cu si ta cumpli cu nan pago di impuesto. El a splica si cu por tin varios factor pa splica e falta di pago, uno specialmente falta di pago di seguro.
Departamento di impuesto ta purbando di reuni cu Cuerpo Policial y Parlamento pa asina busca manera y leynan pa soluciona e problema aki.

Next Post

Casa di doño di 297 Restaurant a recobra su libertad

ORANJESTAD(AAN): Na un principio Polisnan na 297 Restaurant diadomingo marduga a detene 4 persona, 1 hende muhe y 3 hende homber, di cual 1 tabata Colombiano y 3 Venezolano. For di fuentenan bon na altura cu e caso nos a comprende cu den dia mes a laga e señora bek […]