Awe Matutino DIARIO ta celebra su di 41 aniversario

The content originally appeared on: Diario

Jossy Mansur: “Un corant netamente arubiano a nace: E yama DIARIO” — DIARIO su Front Page di 3 di November 1980, 41 aña pasa


ORANJESTAD (AAN):  Na 1980, 41 aña pasa, riba un 3 di November, e prome edicion di DIARIO a subi mercado di Aruba cu un edicion cu a haya un tremendo acogida den pueblo. E prome noticia riba Front Page e dia ey tabata: ‘Gobierno Insular tin pensa di subsidia awa pa e hotelnan’.

Asina cu transcurso di tempo, DIARIO a crece y crece, no solamente den cantidad di noticia, pero den cantidad di pagina y di lectornan. E sosten pa DIARIO den pueblo y den comercio ta sublime. Ta pa e motibo ey cu 41 aña despues DIARIO ta continua como e corant di e pueblo, e corant di Aruba, e corant mas lesa.