Awe mas cu nunca Aruba mester di e Arubiano!

The content originally appeared on: Diario

Tur accion cu por mishi cu turismo ta un paso atras pa Aruba — *Mester evita accionnan cu ta afecta industria di turismo di Aruba — *Awe mester edifica y recupera loke a bay perdi den situacion inespera

ORANJESTAD(AAN)- Cu Aruba y henter mundo ta pasa den un crisis sumamente serio, no ta algo cu mester splica ni mucha.

Incertidumbre y mas incertidumbre ta bini dilanti den maneho di tur pais grandi cu ta trata di na forma pa introduci medidanan, cu por hiba mundo na un recesion cu resultadonan sumamente serio.

E situacion den cual tur ser humano mester biba, ta carga cu problamanan cu ningun momento mundo por a spera algun aña pasa.

Nos mester ta honesto cu nos mes y cu nos comunidad y admiti cu hamas un hende na cualkier pais na mundo por a spera cu e mundo cu nos tabata conoce, a stop di existi.

Esaki ta e realidad. E mundo cu tur hende a tuma como garantisa na entrada di 2020, no ta existi mas.

2020 a nifica destruccion di tur loke hende a tuma como garantia. E nivel di bida a basha abou pa tur hende na un forma of otro ya cu ta entrada di tur hende, tur compania y tur pais a wordo afecta dor di Covid-19, cu no a anuncia kico e lo a haci cu mundo.

Nos mester biba cu realidad cu ta splica cu na 2020 mundo a basha abou y hende ni sikiera por a participa na e proceso laboral y social.

Variantenan di e Coronavirus nobo a sigui otro. Na final di 2021, prijs di gasolin a cuminsa subi y a afecta tur produccion. Bida a bira mucho mas caro y asina mucho mas dificil y awe tur hende y tur instancia ta confronta situacionnan cu na entrada di 2020, nunca por a wordo spera.

Turismo a duna prueba di ta e fuente mas importante di entrada pa Aruba. Cada turista cu dicidi cu e ta pasa su vacacion na Aruba, ta un sosten mas pa economia di e pais, cu ta depende di tanto factor local y externo.

E turista cu ta bini Aruba, ta hende tambe y ta busca un lugar trankil pa e lubida su realidad na su cas, cu sin duda ta wordo afecta pa mes problemanan humano cu ta conoci na Aruba.

Ayera Aruba a registra un situacion den cual miembronan di Aduana di aeropuerto a dicidi cu nan ta drenta accion, pasobra no tabata tin e cantidad suficiente di trahador.

Nos ta comprende cu mester soluciona e situacion. Pero accion mester ta e ultimo solucion sigur na aeropuerto, caminda turistanan cansa di tur loke nan a laga atras na cas, ta paga pa nan haya refugio y alivio di tension diario di bida pa algun dia.

E mundo actual no ta facil pa ningun hende. Pero e ta exigi pa mas cu nunca tur hende duna algo mas di su mes pa asina por yega na un mihor mayan.

E situacion na aeropuerto mester wordo soluciona y di ambos banda mester por comprende otro, pasobra aeropuerto ta e porta, e entrada di Aruba, refugio di hende cu kier lubida problema den bida y ta paga pa nan vacacion, loke ta bira entrada pa economia di Aruba.

E problemanan mundial actual no ta facil pa ningun hende. Pero si kier yega na solucion, si kier yega na un mihor mañan, mester bolbe na e mihor ingrediente di Aruba, cu ta e Arubiano dispuesto di duna lo mihor di su mes pa bienestar general di Aruba.

Den temponan dificil mas cu nunca, busca compromiso, busca solucion pa hunto por sigui traha riba recuperacion, di loke for di 2020 a bay perdi.