Awe Cuerpo Policial ta lanza nan videoclip di mensahe di Fin di Aña

The content originally appeared on: Diario

ORANJESTAD (AAN): Cuerpo Policial Aruba a cuminsa cu un tradicion desde 2013 pa trece un mensahe di fin di aña pa coleganan y comunidad.

Na caminda el a bira grandi y esaki ta pa di 8 aña consecutivo cu nos ta treciendo nos mensahe di fin di aña. Gusta pa grandi y chikito y ala bez cu atencion internacional.

   E aña aki a toca e tema di “E dia aki ta bo dia”. Un storia cu ta cuminsa den pasado na unda nos chikitinnan nan deseonan ta pa un dia nan por bira polis. Na final di e mensahe e chikitinnan ta bira grandi y nan deseo a bira realidad. Un mensahe cu ta trece e alegria, union y speranza pa un cambio di aña nobo. Un mensahe cu un dia bo deseonan tambe por bira realidad djis sigui tin fe y sigui kere.

   “E dia aki ta bo dia” ta un cancion originalmente di Grupo di Betico. Canta pa Sr. Miguel Genser y composita pa Jaderick Croes. Pa Cuerpo Policial Aruba ta un honor cu e aña aki nos por tin otro grupo y artista local pa compaña nos mensahe di fin di aña.

   E aña aki, Cuerpo Policial su mensahe ta dedica na memoria di ex Ministro di Husticia di 2001 pa 2009, Sr. Hyacintho “Rudy” Croes cu recientemente a fayece.

   Un produccion bou encargo di Departamento di comunicacion, informacion y prevencion di Cuerpo Policial Aruba Sr. Lito Lacle y Señora Liliana Rasmijn. Un idea crea un biaha mas pa polis R.R. Angela kende a dirigi y produci e mensahe aki.

   Cuerpo Policial Aruba ta yama danki na cada un persona cu a haci e mensahe di fin di aña un realidad un biaha mas. Danki na cada polis y personal administrativo di Cuerpo Policial Aruba, Señora Irma Gordon altocomisario suplente, Sr. Jaderick Croes, Grupo di Betico, Sr. Miguel Genser, Elite production pa e luznan, Señora Titi Tromp, Señora Patricia de Lange pa habri porta di su hogar pa e grabacion, Michelmira Arends y Grady Chundro, Litmar Lacle y Luz Angela Torrealba, Norman Tromp y Nicole Arends, Jurainy  Luckert y Glendeline Bislip, Yamal y Jualine Courtar.

   Awe Dialuna 20 december 2021 pa 1’or di atardi, Cuerpo Policial Aruba ta lanza nos mensahe di fin di aña. Por sigui esaki riba nos plataformanan social manera; Facebook, Instagram y Youtube.  Medianan local manera Radio y Television lo pasa esaki pa comunidad completo por mira e mensahe aki.