AVP ta sinti cu pueblo ta birando pober na un forma alarmante

The content originally appeared on: Diario

ORANJESTAD (AAN): Den un serie di pregunta riba pobreza creciente y alarmante na Aruba e lider di fraccion di AVP, mr. Mike Eman ta cuminsa na puntra Promer Minister Evelyne Wever Croes

si e “Minister ta conciente di aumento dramatico di costo di bida y gastonan pa subsistencia di un famia na Aruba desde 2018 pa 2022?

    Den bishita y reunionnan di bario e lider di fraccion di AVP mr. Mike Eman ta bisa cu e ta haya confirmacion di e pobreza y di e dolor den pueblo. “Costo di bida ta subiendo den un forma alarmante. Ta obvio cu e medidanan cu Gabinete Wever Croes a implementa durante e ultimo añanan a impacta e cifra di inflacion severamente.

   Na 2017 ainda inflacion tabata menos cu 0% (esta -0.6%). Na 2018 y 2019 esaki a subi drasticamente cu medidadanan di Gabinete Wever Croes. Redoblacion di BBO y e hecho cu e BBO a worde poni tambe riba diferente otro cosnan cu tabata exonera, manera transacionnan bancario y  seguro a crea un efecto inflatorio adicional. Riba gasolin y diesel e impacto tabata dobel, 12%. Tambe e eliminacion di e descuento di 10 cent pa liter di gasolin y diesel tabata tin un efecto negativo grandi”. Tur esaki según e lider di fraccion di AVP, mr. ta haci Gabinte Wever Croes responsabel pa e pobreza alarmante cu tin na Aruba. 

   E ta mustra cu den 2022 inflacion ta sigui e rumbo preocupante. Inflacion acumula door di medidanan di Gabinete Wever Croes tin un impacto dramatico riba costo di bida. Cifranan di CBS ta confirma e aumento drastico aki. Segun cifranan di CBS e bestaansminimum pa un persona pa luna na Dember 2017 tabata 2.066 Florin y na April 2022 esaki a bira 2.382 Florin, casi 400 Florin mas pa luna pa bo por sobrebibi. E bestaansminimum na 2017 pa 4 persona, 2 adulto y 2 mucha tabata 4.338 Florin y awor e ta 5.003 Florin casi 700 mil Florin pa luna mas pa bo por sobrebibi. Eman ta bisa cu e panorama socio-economico hustamente ta mustra un deteoro ultimo añanan, es decir cu e 700 Florin aki mas di gasto mensual ta pone cu nos pueblo ta empobreciendo na un forma alarmante.

   Den periodo di gobernacion 2009-2017 e gobierno di e tempo ey no unicamente a tene inflacion abao, pero tambe a sostene e poder di compra di comunidad cu un maneho conciente di mantene e forza di compra di comunidad. Asina a aumenta bijstand, salario minimo, pensioen di vehez, a introduci reparatie toeslag pa empleadonan den secto priva, a introduci schoolkinderentoeslag pa famianan di menos recurso. Consistentemente a percura pa salario di empleadopnan publico mantene nan forza di compra cu indexering, voorjaarspremie y najaarspremie. Eman ta bisa cu desde 2017 pa 2022 no tabata tin ningun ahuste structural di apoyo pa e poder di compra di comunidad. Alcontrario cu e medidanan y ausencia di correccion ta atrás e poder di compra a keda bay di 2018 pa 2022. Cifranan di Banco Central y CBS ta confirma esaki. Aruba ta empobreciendo den un forma penoso y alarmante.     

   Serie di Pregunta: Relaciona cu empobrecimento alaramante aki e a haci Promer Minister Evelyne Wever Croes e siguiente preguntanan:

(*) Minister ta conciente di aumento dramatico di costo di bida y gastonan pa subsistencia di un famia na Aruba desde 2018 pa 2022?

(*) Minister ta conciente cu e aumento dramatico aki ta conduciendo na un empobrecimento preocupante na Aruba?

(*) Minister ta conciente cu e empobrecimento aki ta fracturando famianan na Aruba, creando hopi depresion y malestar. Un cu e otro tambe cu efecto riba saludo di nos hendenan y riba seguridad den barionan?

(*) Minister ta conciente cu no unicamente e maneho di 2009 pa 2017 di sosten di poder di compra a worde para, pero tambe tur iniciativanan cu tabata worde tuma pa sostene calidad di bida den barionan y fortifica e cohesion social a worde para?

(*) Minister ta conciente cu na e momentonan aki hustamente mester sostene esnan di menos recurso?

(*) Minister ta conciente cu entre otro na FCCA ta aplicando aumento di huur na momento cu un persona haya schoolkinderenentoeslag pa e yiu cu ta bay school ?  Minister no ta kere cu bao di e condicionan actual di aumento dramatico di costo bida cu un compensacion cu a worde introduci pa cubri gastonan di school no mester worde incacula den e draagkracht di e famia pa cu calculacion di prijs di huur di un cas social?

(*) Minister por informa con tin pensa pa sostene e miles di famianan cu ta caiendo pobreza y miseria na Aruba?

(*) Minister por informa con ta pensa di atende cu e negligencia di barionan desde 2018 cu a para tur programa di bario y cohesion social?

(*) Minister por informa pakico a para tambe tur e proyectonan di renobacion di bario?

(*) Minister por informa pakico ta neglicia e mantencion di e barionan y tur e embeyecimento y facilidadnan deportivo y recreaccion cu a worde realisa entre 2009 – 2017 hustamente pa crea un ambiente positivo den e barionan?