AVB ta yuda den rehabilitacion di futbolistanan lesiona

The content originally appeared on: Diario

ORANJESTAD (AAN): Arubaanse Voetbal Bond (AVB) a cuminsa cu e proceso pa implementa diferente proyecto di proyecto integral “Grow football Aruba”, cual ta consisti di 8 proyecto cu lo desaroya futbol na Aruba.


Dos di e proyectonan aki cu ta den pleno ehecucion ta e proyecto “AVB Academies” y e proyecto “National Teams Aruba, cual ta teamnan nacional den diferente categorianan”. E exigencia cu FIFA a stipula, cu tur federacion mester tin su mes un departamento medico, a pas precies den e proyectonan aki. 

Na momento cu tin un academia unda ta guia hungadonan profesionalmente, e guia no ta solamente riba tereno pero tin di bay mas leu. Hunto cu FIFA, a setup un departamento medico cu tur ekipo necesario pa guia futbolista na momento cu e ta lesiona. A acerca CEMEDAR, nan ta traha cu atletanan di rendimento halto, cu ta presta na nivel halto.

AVB a cera un acuerdo cu CEMEDAR pa asisti den e proceso di guia e futbolistanan lesiona. Ta dirigi primordialmente riba e hungadonan di seleccion, pero tambe esunnan di e academia. E siguiente paso cu ta bay tuma, ta incorpora e clubnan den e proceso pa guia futbolista. Ta trahando riba e parti con ta bay implement’e, cuminsando di Division Honor sigui pa Division Uno y otronan. E proyecto ta grandi.

Awo e federacion ta dispone di un departamento medico, di cual tin un dokter specialisa con pa guia atleta, den e caso aki futbolista, lo miho posibel. Den e departamento aki tin fisioterapista y psicologo, cu ta bin di CEMEDAR. Na momento cu identifica cierto hungado, cu por ehempel problema social, problema di violencia na cas of cualkier problema cu por tin, e ora ey ta apunta nan pa bay den sesion cu e profesionalnan aki.

Ta trahando cu gobierno pa mira si por yega na un trahado social tambe pa asina por brinda mas ayudo na e hungadonan cu ta forma parti di sea e Academia of un di e seleccionnan nacional. Banda di e problemanan existente bou hubentud y awo cu e pandemia, e casonan a aumenta mas. A pensa pa agrega un trahado social na e team pa guia e futbolistanan miho. E intencion ta pa guia e futbolista, pero tambe asisti e coach-, club- y dirigentenan. Tambe pa trata e futbolista na momento cu e ta lesiona.

AVB a acerca CEMEDAR, pasobra nan ta un fundacion medico deportivo pa tur atleta na Aruba. AVB tin interes pa proteha su atletanan, pa brinda cuido y p’esey nan tabata kier e servicio medico pa futbol. CEMEDAR tin varios profesional trahando riba e campo deportivo.

Dr. Ricardo Vargas, dokter den Medicina Deportivo di CEMEDAR, a splica cu nan a haci un deal cu AVB y crea dos camber cu tur servicio y mashin pa brinda cuido na futbolista. Nan tin servicio di psicologia, masashi, terapia y fisioterapia. AVB ta e unico federacion di Aruba cu e oportunidad di tin team medico pa su atletanan.

Nan ta riba veld cu e atletanan y ta hasta biaha cu nan. Deporte semper mester tin un grupo di apoyo. Medicina cu tur specialidad ta contribui cu e atletanan. Segun dr. Vargas, si e atleta no tin un lesion, nan ta dun’e massage y esey ta pa evita cu e no ta haya lesion. Tur esaki ta pa evita cu mester warda un luna pa por presenta na specialista of warda pa fisioterapia.

Di tin CEMEDAR eynan, por haya tratamento dos of tres biaha pa siman. E mayornan ta contento y gradicido, pasobra antes e mucha mester a warda hopi of ta retira di futbol pa un lesion. Si no trata e lesion agresivo y di biaha, e atleta ta perde interes pa sigui hunga futbol.