Autoridad a detene conocido Antoni Gario pa un caso serio di Abuso Sexual di su mesun yiu muher

The content originally appeared on: Diario

ORANJESTAD (AAN): Oficialnan di Jeugd en Zeden Politie (JZP) hunto cu demas funcionarionan a yega di sorpresa Diabierna na e cruzada di Orinocostraat y Missouristraat na San Nicolas,

pa asina ehecuta un orden di detencion contra un persona kende ta sospecha di a Abusa Sexualmente di su mesun yiu muher.

   Esaki a socede den oranan di mainta, y nan a rondona e cas pa evita cu e por a huy for di porta di cushina.

   Di e forma ey, oficialnan di JZP a detene e homber Wilfred Antoni G.M. Gario, naci dia 7 di Juli 1969 na Aruba (pues tin 52 aña di edad).

   El a wordo hiba den vehiculo policial, y mesora a bay cune di eynan.  Testigonan a bisa cu nan a mira con autoridad a keda eynan pa algun rato ta revisa par di cos, y a hasta mira nan cu trapi ta subi y check algo na e dak.

   Na final, testigonan a mira cu autoridadnan a confisca e.o. un Laptop Computer y tambe Smartphone di dje, y tur esaki awor lo bay haci un investigacion forensico riba nan pa mira “ki tur secreto” nan por topa cune.

   Mientras tanto, tanto Vocero di Polis Lito Lacle, y tambe vocero di Ministerio Publico, Ann Angela a confirma cu e detencion a tuma lugar.

   Segun Lacle, e ta un investigacion cu a cuminza desde aña 2019, na momento cu su propio yiu muher e tempo ey ainda no tabata tin e edad di 16 aña. 

   For di e keho cu e yiu muhe mes a entrega contra su tata, oficialnan di Polis mester a haci un investigacion riguroso y extenso.

   Despues di haya tur e informacion necesario, a presenta e dossier na Ministerio Publico, y aki Fiscal a haci revision y a conclui y opina cu tin suficiente base pa duna JZP e ordo pa detene e conocido cantante y compositor Antoni Gario.  E tabata coordinador tambe di ex-Ministro Mike DeMeza durante Gabinete Mike Eman.

   Den pasado caba, Gario a yega di wordo deteni caba pa caso similar, esta na Juli 2019 el a keda deteni como sospechoso di Abusa Sexualmente di un mucha muher di 14 aña di edad.  Pero ora cu e investigacion a start e tempo ey, e mucha muher a cambia su declaracion boluntariamente, y ora cu Fiscal a haya sa esey, mesora a laga Gario den libertad como 5 dia despues.

   Pero awor na 2022, ta parce cu tin prueba mas fuerte, y pesey e interogacion a cuminza desde ayera caba.

   Polis ta corda pueblo, cu pa Cuerpo Policial por resolve y investiga mas casonan asina aki cooperacion y informacion di pueblo di Aruba ta hopi importante, pesey nan ta pidi si bo tin cualkier informacion yama e Tipline di Polis cu ta: 111-41. Nan ta garantisa cu bo ta keda anonimo.