Aumento di prijs tur caminda ta afectando bida di tur pensionado

The content originally appeared on: Diario

Ivo Valdes di OPPA:

ORANJESTAD (AAN): E aumento drastico recien di prijs di gasolin na Aruba, unda cu e ta wordo bendi na 321,2 cent pa liter, tabatin un efecto pisa riba bida di tur Pensionado na Aruba.

   Esey ta loke president di Organizacion di Pensionadonan Publico Arubano, esta Ivo Valdes a indica.

   “Nos tin varios siman caba cu un gasolin cu ta cabando cu nos bida na Aruba,” Valdes a indica den un entrevista.  El a bisa esey pasobra unavez cu gasolin subi, esey ta pone cu tur producto automaticamente ta subi.

   “Ami tin dos pensiun, pero mi ta pensa tur dia riba e grandinan cu tin 1 pensiun so.  Si bo drenta Supermarket y bo mira e prijsnan, bo ta puntra ta con e hendenan aki ta bibando?”

   Valdes a mustra cu for di 2017 nan a entrega un documento na Gobierno pa tene cuenta cu e envehecimento cu ta tumando lugar formalmente na Aruba.  Esey kiermeen cu mester bin cu un maneho special pa nos grandinan.  Te dia di awe, e unico cos cu nan a tende ta cu tin un plan pero esey no a bira realidad ainda.

   Segun Valdes, ta spera cu prome cu aña caba, cu OPPA lo por tende algo di e asunto aki, como cu nos grandinan ta esnan cu ta sufriendo mas den e caso aki, cu tur e aumento di productonan cu ta tumando lugar.

   “Nos pensiun casi no ta yega pa nada mas!”  Sinceramente e president di OPPA no sa con e pensionadonan cu ta mas grandi y cu tin un solo pensiun ta haci cu nan entrada di tur luna.

   El a bisa cu miembronan di OPPA ta preocupa cu e ley pa corta den AZV a wordo acepta, aunke e no a ser implementa ainda.  Esey kiermeen cu un dia diripiente e ley ta wordo introduci, y esey lo afecta nos grandinan aun mas.

   Pues apart di tur medida cu ta na caminda, tin di tene cuenta cu e ley di contribucion propio cu ta afecta pueblo grandemente.

   Tambe nan ta mira con keto bay tin Docternan cu ta bandonando Aruba, y lista di espera pa wordo atendi pa Specialista of haci Test ta birando grandi, y nos grandinan ta sigui sufri mas di tur esey.