Augustus 2022 lo ta determinante pa futuro financiero di Reino

The content originally appeared on: Diario

Na Februari 2022 IMF a adverti Europa pa problema di Euro awe

*Wever-Croes y Hulanda mester por topa otro den crisis mundial

*Reino mester acepta IMF cu ta consehero di Aruba y di Europa 

ORANJESTAD (AAN) — E momento ta yega pa 180 hoben Arubano subi avion pa na Hulanda nan habri caminda pa nan futuro y a base di nan conocemento, futuro di Aruba.

Futuro!

E palabra cu ta expresa e preocupacion di henter mundo, cu a mira futuro basha abou na 2022 ora Rusia a dicidi di invadi Ukraine y tur e problemanan cu mundo a silencia durante ultimo cincuenta aña rementa den hasta menasa di guera nuclear.

Ta den un tension enorme, Aruba mester habri caminda pa un futuro, cu for di 2014 ta den Intensive Care financiero.

Manera DIARIO a splica for di algun siman pasa, e plannan cu tin pa Aruba sigui cana riba tereno financiero y economico y hasta e Acuerdo entre Aruba y Hulanda mester wordo adapta na 2022, cu a presenta un escenario economico y financiero mas serio cu e pandemia.

Nos a tuma nota di e informacionnan di Prome Ministro Mr. Evelyn Wever-Croes cu na Hulanda ta traha riba un Memorandum Financiero Economico nobo pa bandona e problemanan cu e pandemia a laga atras.

E anuncio di Prome Ministro Mr. Evelyn Wever-Croes pues ta di acuerdo cu e opinion cu DIARIO a duna den consulta cu expertonan cu a indica cu Guera di Ukraine a empeora e situacion mundial di tur pais na mundo, loke ta nifica cu acuerdonan pa soluciona e problemanan cu e pandemia a laga atras, mester wordo adapta na e situacion nobo.

Manera Prome Ministro Wever-Croes a trece dilanti, Gobierno di Aruba ta sigui conseho di e Fondo Monetario Internacional, cu a bati alarma grandi pa e situacion mundial actual y ta conta cu asistencia di un entidad Hulandes.

Ministro Presidente mester atende cu CaFT y Gobierno Hulandes tambe pa asina  por sigui traha riba futuro di Aruba na bienestar di Aruba,

E hecho cu Gobierno tin IMF como su consehero, mester por inspira Hulanda pa realisa cu Aruba mester adapta su maneho Economico Financiero, pero cu Hulanda tambe mester adapta cierto exigencianan cu a conduci na su peticion pa Conseho di Ministro di Reino duna “aanwijzing”.

Si Aruba haya “aanwijzing”, historia di Gobierno Mike Eman na 2014 ta ripiti y Aruba bou supervision di Reino, e cifranan di Aruba ta wordo impone.

Deliberacionnan entre Prome Ministro Wever-Croes y Hulanda ta continua pero nos tin un problema pa comprende, pakico politiconan Hulandes, den buskeda di un solucion pa Aruba, no ta laga na IMF pa dicidi kico ta miho pa Aruba na e momentonan aki.

IMF ta consehero di Hulanda y di Europa tambe y por cierto, na Februari 2022, IMF a mustra con Europa, incluso Hulanda, mester mira bon kico nan ta haci pa evita problema serio den futuro.

E futuro cu IMF a papia di dje no a atarda pa presenta y awe Euro ta den problema serio, pa cual IMF a adverti na inicio di 2022, ora el a indica cu Union Europeo mester conoce entre otro un reforma fiscal.

IMF, International Monetary Fund, ta consehero di Union Europeo y Hulanda tambe pa un motibo simpel. Ta IMF mester yuda paisnan hiba un maneho cu ta sostene nan moneda y cu ta evita caida di e moneda.

Mientras awe e impresion ta wordo crea cu Aruba, cu tin IMF como su consehero financiero, no ta hiba un maneho saludabel pa cuida balor di Florin.

Siman pasa no tabata Florin pero Euro cu a bay off den e inflacion pa cual IMF a adverti Union Europeo na 202.

E reunionnan entre Gobierno di Aruba y Reino ta continua na Hulanda na inicio di Augustus cu ta un luna determinante pa futuro di Aruba y di mundo.

Ta na Augustus Reino mester dicidi kico lo pasa cu COHO pa yega na reforma financiero di e paisnan Hulandes den Caribe.

Augustus lo bira decisivo pa loke ta trata e impacto di inflacion mundial, cu a manda tur prijs halto a base di e prijsnan di petroleo relata na e problemanan na Ukraine.

Na Augustus por conclui cu pasado mester wordo cera pa habri porta pa un futuro nobo yena cu tanto incertidumbre, cuno por papia di punto final di nada, pero solamente di “comma”.

E loke a resta di futuro di petroleo, e problemanan di Euro y Dollar y nan resultado, E posibilidad grandi cu Inflacion por bira Recesion na 2023.

Na Augustus muchanan mester bolbe school. Temporada di vacacion ta termina. Decisionnan mester wordo tuma den un Reino, na Aruba, na Europa y na henter mundo.

Augustus 2022 lo bira e luna determinante pa un futuro, den cual e mucha mester por topa cu inspiracion pa asina haya animo nobo pa e lucha pa un dia, e asumi su responsabilidad pa su pais.