Atraco violento na Eagle Beach unda a hinca un jogger femenino

The content originally appeared on: Diario

Persona haciendo ehercicio anochi laat

ORANJESTAD (AAN): Aña pasa tabatin un caso serio di asalto cometi riba un persona cu tabata jog riba WVB Boulevard net banda di e viaducto na Meiveld.

   Awor a bin sali na cla cu Dialuna den oranan di anochi, un asalto a socede den e area cu hendenan ta usa pa core dilanti Eagle Beach.

   Dialuna anochi laat pa 11:58 pm, casi mey anochi, e yamada a drenta na Central di Polis cu un atraco violento a caba di socede na Eagle Beach, den e area pabao di Paradise Beach Villas.  Mesora a manda unidad di Polis di Noord pa e lugar.

   E prome unidad di Polis cu a yega na e lugar, a bin topa cu e dama victima y a mira cu e ta herida.  Mesora a pidi pa Ambulans yega eynan.

   E victima a bisa cu e tabata haciendo ehercicio eynan y tabata jog (core), y diripiente un homber a bula su dilanti cu un cuchiu apunta riba dje, y a comete atraco.

   E dama a splica Polis, cu el a trata di resisti y a hasta lucha cu e atracador, y aki ta unda cu e atracador a haci mas esfuerso y a hink’e.  Despues di esey e atracador a ranca y kita su smartphone for di dje, y a core bay di e lugar.  Posiblemente el a huy den un auto color shinishi.

   Polis a puntra e dama si e por duna descripcion, y a bisa cu e homber tabata bisti full na preto.  El a core despues bay direccion panort.

    Ambulance a yega na e lugar, unda paramediconan a observa e herida, y despues di a stabilisa esaki, nan a dicidi pa hibe mesora pa Servicio di Emergencia na Dr. Horacio Oduber Hospital. 

   Atraco Team a presenta na e lugar como tambe team forensico di BFTO, y aki nan ta sigui cu e investigacion. Departamento di slachtofferhulp tambe a presenta pa asisti e victima. E area aki tin basta security camera, pues esaki lo por yuda autoridad basante.

   Cuerpo Policial ta haci un suplica pa esnan cu a wak algo of sa algo pa yama e tiplijn di polis cu ta 111-41. Bo ta keda anonimo.