Atraco na Paradera a resulta di ta un acto completamente falso y inventa

The content originally appeared on: Diario

Rebendedor di loteria mes a keda deteni!

ORANJESTAD (AAN): Na varios ocasion a yega di trece dilanti, cu ora bo haya les di criminologia, e prome cos cu nan ta ponebo corda semper ta, cu den tur acto di crimen bo no mester lubida nunca cu kizas e victima mes ta esun cu a comete e acto!

   Y un biaha mas esaki a wordo confirma na Aruba atrobe, unda un victima na final ta bin resulta cu el a haci un denuncia falso, y e mes a orkesta tur cos.  E biaha aki ta un denuncia falso di atraco!

   Tabata Diabierna 25 di Februari 2022 pa 8:26 pm cu yamada a drenta na Central di Polis cu na e botanica ‘Gran Suerte’ cu ta situa net dilanti tereno di cas Paradera 130-A riba caminda grandi, un atraco a caba di socede.  Mesora Polisnan di Santa Cruz y tambe di Oranjestad a yega eynan, y a bin haya e rebendedora abao sinta cu su wowonan tur cora y produciendo exceso di lagrima.

   Su storia tabata cu dos atracador a yega, di cual uno cu cara full tapa na preto, bisti tambe full na preto, y a spuit liquido di Pepper-Spray den su cara.  Un di e atracadornan a rek man via bentana y a bay cu su tas cu ta contene benta di dia.  E lugar aki ta bende loteria, pero e no ta un rebendedor di Lotto.

   El a bisa cu e tabatin como 1.000 Florin den e tas, mas placa larga.  E tabata preparando pa cera e lugar ora esaki a socede.  E lugar aki ta un tiki pabao di MFA Paradera, net otro banda di caminda.  Ambulans a yega pa asina duna e victima tratamento.

   Polisnan a tuma tur dato, a papia cu tur hende eybanda, y a pone Atraco Team na altura.  Polisnan a acudi hasta na New Food Center 88 otro banda pa check security video.

   For di e anochi ey, a cuminza cu un investigacion riguroso riba loke a socede aki.  Y aki ta unda cu e investigadornan veterano di Atraco Team a cuminza nota posiblemente inconsistencia den e storia.

   Pone e puzzle hunto: Esaki ta precisamente loke ta un berdadero “investigacion riguroso” ta encera!  Ora cu oficialnan ta pone tur detaye hunto!  Ta analiza e declaracion di e victima.  Ta check e declaracion di cada Polis cu a yega.  Ta bay letra pa letra riba declaracion di testigonan.  Ta mira e resultado di cualkier investigacion forensico.  Ta hasta check reaccion di e victima na esnan di Bureau Slachtofferhulp cu e anochi ey tambe a acudi na Paradera.

   Despues di mas di 2 luna di investigacion, a presenta tur e descubrimentonan aki na Ministerio Publico.  Fiscal ta esun cu ta revisa tur esaki, y tambe a yega na mesun conclusion!  Ta parce cu loke a socede e Diabierna anochi ey na Paradera, ta completamente un “Show di Comedia”.

   Pesey Diasabra 7 di Mei 2022, riba ordo di Ministerio Publico, oficialnan di Atraco Team a acudi na adres di e victima, y a detene.  Awor e no ta victima mas, sino sospechoso principal.

   Vocero policial a confirma cu nan a detene e muher Miriam Jenny Koolman, naci dia 7 di Februari 1968 (e tin 54 aña), pa acusacion di denuncia falso.  El a wordo hiba dilanti Fiscal Auxiliar, kende a duna ordo mesora pa e keda encarcela pendiente mas investigacion y interogacion.

   E persona aki den pasado tabata traha como fotografo di algun medio di comunicacion riba e isla.  E mester por sa con hopi bo ta gasta tempo y atencion pornada di oficialnan hudicial cu ta investiga bo caso falso, envez di ta atende casonan di berdadero urgencia.  Su “auto-atraco” ta un mal hecho y sigur Fiscal lo no tolera cu bo ta despista henter un Cuerpo investigativo, y spanta henter un pueblo di un acto di atraco cu hamas a socede.

   Pero esaki no ta e prome caso di denuncia falso di atraco cometi riba Oficina di Catochi na Aruba!  Ainda por corda e caso den Rudolf Arendsstraat na Companashi unda aki tambe a actua comosifuera cu un atraco a ser cometi, siendo cu esey no ta e caso.