Atletanan special tambe por forma parti di federacionnan den futuro

Byron Lesire, atleta special di Bowling:

ORANJESTAD (AAN): Byron Lesire ta un hoben autista hopi conoci na Aruba pa e trabaonan valioso cu e ta haci cu Fundacion Autismo Aruba. Ademas di esey, Byron ta un atleta dedica den e deporte di bowling. 

Siman pasa, Comision Arubas’ Athlete Commission (AAC) hunto cu Comite Olimpico Arubano (COA) a organiza pa prome biaha un Forum di Atleta na Aruba. Rond di 50 atleta a participa den un programa dinamico y inspirador, enfoca riba desaroyo personal y profesional, tanto den deporte como den bida diario. 

Byron a tuma parti den e forum aki y a comparti su experiencia cu hopi entusiasmo, destacando cu el a siña hopi cos nobo. Segun Byron, e tres topiconan cu mas el a gusta tabata creacion di contenido, nutricion y public speaking. 

Tocante inclusion di atletanan special, Byron a expresa su deseo pa den futuro mira mas participacion di atletanan special, incluyendo di su mes ekipo, den forumnan manera esaki. E a enfatisa tambe cu, pa logra inclusion, atletanan special mester por forma parti di federacionnan, y tin nan mesun comision y mesun derechonan pa forma parti di federacionnan.