ATIA ta teme cu e reforma fiscal ta bay a costo di nos poder di compra

The content originally appeared on: Diario

ORANJESTAD(AAN): Diamars atardi a tuma lugar un conferencia di prensa na ATIA,

caminda cu Comerciantenan Uni Aruba, Camara di Comercio (KvK), AHATA y ATIA mes a duna nan reaccion riba e reforma fiscal cu Gabinete Wever Croes ta bin cune.

Director di ATIA Herrick Henriquez a cuminza na bisa cu e ta contento cu e gremionan tabata tin nan di dos reunion (breakout session) cu Departamento di Impuesto.

“Nos ta contento cu den e session aki nan a presenta algun scenario nobo, unda cu nan a tuma na cuenta e comentarionan di e gremionan di Aruba”.

E parti cu nos kier trece dilanti awe ta algun preocupacion cu nos tin toch ainda.

Pa nos e reforma fiscal mester ta algo cu mester bay yuda restructura e isla, yuda recupera Aruba y tambe yuda moderniza nos leynan pa e reforma fiscal y pa tur otro ley cu tin den e landspakket, segun Henriquez.

El a sigui bisa tambe cu e intencion ta pa enfoca pa e reforma no bay a costo di e poder di compra.

“Nos poder di compra por baha y esey kiermen cu fin di luna bo macuto den supermercado ta bay tin menos producto den dje”, segun e director di ATIA.