Asesinato di Ignacio tabata un venganza di gang contra gang

The content originally appeared on: Diario

ORANJESTAD (AAN): Manera DIARIO a publica, Fiscal a baha cu tur peso di ley riba e sospechosonan culpable di e asesinato cruel di Lisandro (Sami) Ignacio. Fiscal a exigi 22 aña di prison pa e rumannan Brandon Wouters y Joshua Wouters.


Pa e otro dos sospechosonan Will Vrolijk y Yael Frans, Fiscal a exigi 16 aña di prison.

Tratamento di e caso aki a tuma henter dia y DIARIO den e articulo aki ta publica un analisis interesante di Fiscal, for di e investigacion amplio cu a tuma lugar.

TA YOSHUA A TIRA SAMI

Fiscal a bisa cu for di investigacion ta mustra cu ta Yoshua a tira mata Sami. El a mustra cu Vrolijk a bisa cu el a mira Yoshua cu un pistool preto 9 mm y cu un peña. Frans a bisa cu Vrolijk tabata para hopi serca y a mira Yoshua. Tanto Frans como Vrolijk a bisa cu ta Yoshua ta esun cu a tira. Tabatin confrontacion entre Frans y Yoshua y Vrolijk y Yoshua. Tur dos a reconoce Yoshua como esun cu a tira.

TATTOO DRUPPEL BAO WOWO

Fiscal a bisa cu Yoshua a laga pone un druppel bou su wowo despues cu a tira Sami. Esey ta un simbolo di gang ora a tira un hende mata. Fiscal a sigui bisa cu e amiga di Yoshua a bisa cu e tabata kedando den hotel ora cu Sami a wordo tira mata. El a bay serca Yoshua y Yoshua tabata huma marihuana riba nomber di Sami. E amiga mes a bisa cu Yoshua a bisa cu el a tira Sami mata. Fiscal a mustra cu Yoshua mes a bisa cu el a huma marihuana riba nomber di Sami y cu ta haci esey ora un enemigo a wordo mata. Fiscal a mustra cu Brandon tabata den auto. Tanto Vrolijk como Frans a bisa cu Brandon tabata den e auto promer, durante y despues cu Sami a wordo mata.

NO A HAYA ARMA

Fiscal a bisa cu a base di e huls haya na unda a tira Sami mata, a constata cu ta un pistool Winchester 9 mm. Den cellular di mama di Yoshua a haya potret di Yoshua cu un pistool. Yoshua a bisa cu e arma ta di Brandon. E potret aki ta di Maart 2021. Fiscal a bisa cu Brandon a wordo tira na Juni 2019 pa Calvin Kelkboom. Brandon tabata arma e dia ey cu e pistool y a los un tiro. Fiscal a bisa cu tin sospecho cu ta e arma ey ta esun cu a wordo usa pa mata Sami. Ta asina cu Recherche no a logra haya e arma aki.

VENGANZA ASESINATO

Fiscal ta haya cu ta e motibo di asesinato di Sami, ta Brandon. Sami ta miembro di e gang di Pos Chiquito y door cu Brandon na Juni 2019 a wordo tira y a keda den rolstoel, a tuma venganza. Brandon a bisa cu e tabata miembro di e gang di Village pero despues cu el a wordo tira, e no ta miembro mas. Na opinion di Fiscal, tin un persona a bisa cu desde cu Brandon a wordo tira, a bin kiebro den gang di Village. Tin tres gang awor den Village y un di nan ta di Brandon. Tin un testigo M. a bisa cu Brandon cada biaha ta bisa cu M. mester tuma venganza contra un miembro di gang di Pos Chiquito. Door cu M. a nenga di tuma venganza, el a wordo menaza.

   Fisal a mustra cu Sami lo tabata presente ora cu Brandon a wordo tira. Parce cu Sami lo ta famia di esun cu a tira Brandon.

   Fiscal ta mustra cu Yoshua a tira Sami pa venganza di su ruman Brandon. Tin testigo a bisa cu 5 dia promer cu e asesinato Sami a bisa cu un hende a bin serca dje y bis’e cu su dianan ta conta. Fiscal ta haya cu ta Brandon a organiza e asesinato. El a mustra cu Brandon a instrui Vrolijk cu e mester bisti na preto y cu nan ta bay regla algo. Vrolijk a kere cu lo ta bay bringa cu un hende. E tabata bisa nan kico mester haci. Nan a bay na un cas bou construccion pa warda Sami yega su cas. Manera el a yega, nan a bay e cas y Yoshua a tira Sami mata.