Aruba y Hulanda a acorda oficialmente e di cuater agenda di ehecucion pa 2021

The content originally appeared on: Diario

 ORANJESTAD (AAN): Gobierno di Aruba a informa diahuebs cu un bes mas Aruba y Hulanda oficialmente a acorda e contenido di e Agenda di Ehecucion pa 2021 relaciona cu e trayecto di Landspakket di Aruba.


Esaki a tuma luga den forma digital entre Secretario di Estado Raymond Knops y Minister-President di Aruba Sra. Evelyn Wever-Croes.

            E Agenda di Ehecucion ta e di cuater agenda y e delastro pa aña 2021. Asina Aruba a demostra cu, no obstante e intensidad di e trabaonan y retonan, nos pais ta cumpliendo den gran forma cu un di e condicionnan esencial. Un palabra di gradicimento ta bay pa tur profesional cu a traha dia y nochi pa logra e meta aki. Aruba por ta orguyoso di su ekipo local.

            Por observa den e di cuater Agenda di Ehecucion pa 2021 cu varios investigacion a inicia of lo yega na nan conclusion. Durante e periodo aki a tene y lo ta teniendo varios ronda di consulta cu actornan clave. Esaki a base di colaboracion entre e ekipo di Aruba y Hulanda. Por indica tambe cu e informacion duna den e Agenda di Ehecucion ta un resumen di e totalidad di trabaonan haci y tin como meta informa comunidad di e trayecto andando. 

            Den aña 2022 e trabaonan lo sigui y asina lo ta trahando riba e prome Agenda di Ehecucion pa e aña ey.

            E Agenda di Ehecucion ta un documento cu lo wordo refina continuamente. Esaki lo tuma luga den colaboracion estrecho entre paisnan.

            Por indica cu Pais Aruba ta riba bon caminda y cu respet, madures y dedicacion, hunto nos lo recupera nos pais.