Aruba y Arubianonan mester ta prepara pa 2023 dificil!

The content originally appeared on: Diario

Na Hulanda medidanan ehemplar pa awa y coriente na disputa

*Migracion topico na Hulanda den situacion pio cu recesion

*Cholera na Haiti ta señal di loke hamber y miseria ta produci 

ORANJESTAD (AAN) — “No papia mas di recesion. Papia di un cambio total, cu lo inclui un caida economico internacional serio, cu lo produci mucho mas cu loke ta wordo considera recesion.”

Na inicio di Siglo 21, mundo a conoce un situacion cu a resulta den un recesion, cu a haci necesario pa Aruba a introduci e medida di BBO pa a confronta su situacion financiero.

E sabor politico di e medida tabata asina sabroso, cu poco atencion a wordo dedica na e hecho cu mundo a drenta un situacion sumamente dificil y e palabra “recesion” casi no ta bati e alarma cu e mester bati na paisnan.

Na e momentonan aki problemanan mundial ta sigui crece mientras e cantidad di aspectonan cu ta produci problema ta sigui aumenta.

“Aruba y Arubianonan mester ta prepara pa un 2023 sumamente dificil. Diariamente mas factor ta uni na e situacion mundial critico, cu ta mishi cu decisionnan importante cu a wordo tuma na paisnan grandi cu mester mira con ta adapta y sigui adapta,” expertonan ta trece dilanti.

Nan ta bay di acuerdo cu informacionnan internacional di expertonan cu ta adverti cu na mayoria di pais na mundo, hende no kier realisa con serio e entrada y situacion mundial por bira na 2023.

“Ta sumamente humano cu hende generalmente kier deshaci un rato di e cantidad di problemanan cu mundo a conoce. Sinembargo, mester ta prepara pa e cadena cu ta sigui crece y ta exigi atencion y precaucion,” a bini dilanti.

Uno di nan pa Aruba sigur ta presenta su mes riba e alarma cu a wordo bati den region pa motibo di e explosion di Cholera na Haiti.

DIARIO, na un forma continuo a splica Aruba cuanto problema e region Caribense ta nifica pa Aruba. Den e contexto aki a papia di e situacion na Haiti, cu ta afecta e pais seriamente.

E impacto di pobresa riba presencia di malesa tambe a bini dilanti, sigur na October ora a bati alarma pa e casonan di cholera na Haiti.

Hamber ta e motibo tras di nuebe di cada diez caso di Cholera na Haiti, cu ya a registra oficialmente 12 Mil caso, pero ta pensa cu e cifra ta mucho mas halto. E cantidad di morto cu Cholera a produci na Haiti, a alcansa 216 ayera.

Casi mitar di e total di casonan lo ta mucha, cu den mayoria di e casonan ta biba den situacionnan desastroso, den cual falta di cuminda, awa y coriente ta hunga un papel grandi.

Prijs di cuminda, awa  coriente a resulta den situacionnan extremo productor di malesanan na paisnan sumamente pober manera Haiti.

Pero prijs di cuminda, awa y coriente ta e motibo basico di problema social serio no paisnan grandi y considera rico, manera Hulanda cu continuamente ta na careda cu su prijs di awa y coriente.

Gobierno di Hulanda a bini cu un pakete di medida pa enfrenta e situacion cu a surgi a base di inflacion, causa pa e aumentonan di prijs, na 2022.

Na Aruba tambe voznan a lanta, pa sigui e ehempel di Hulanda cu awe, sinembargo, ta na discusion serio.

Gobierno di Hulanda a dicidi pa introduccion di un plafond pa ganashi pa companianan cu ta produci energia. Awor e decision ta na disputa pasobra e por ta contra areglonan di Union Europeo, cu no ta acepta pa paisnan compensa ganashi di companianan di energia.

Migracion, entrada ilegal na Hulanda, ta un topico importante y uno cu ta mishi cu problemanan di Aruba tambe, sigur despues cu Cholera a bati alarma tambe, den e cantidad di refugiadonan social cu ta bati na porta di Aruba.

Na Hulanda un seperacion serio lo wordo haci entre peticion pa asilo y migracion ilegal pa asina frena problemanan serio di e pais, cu ta atrae cantidad di persona di paisnan den problema serio.

Aunke Hulanda ta economicamente mucho mas fuerte cu Aruba, aki e base cu ta atrae migrantenan pa Reino, ta bini dilanti.

E pakete social cu paisnan den Reino Hulandes conoce, cu entre otro ta evita cu hende ta muri di hamber pasobra e no tin entrada di trabou por ehempel, sigur ta hunga un papel importante pa no papia di areglonan social manera pensioen di behez, sistema educacional y vivienda social ta encera.

Expertonan ta mustra DIARIO cu tur instancia tin e deber sagrado pa yuda prepara Aruba y Arubianonan pa un temporada mucho mas dificil cu a pensa y peligernan cu hamber y falta di necesidad basico ta crea na paisnan cu ta rondona Aruba y e resultadonan cu nan lo tin riba e anhelo pa migracion pa Aruba y tur peliger cu e ta encera si e no ta bou control.

“Mester tene e nivel di bida na Aruba nos dilanti pasobra e ta atractivo pa migracion descontrola na momento cu Aruba hunto cu mundo ta drenta un 2023 sumamente dificil, sigur si tene na cuenta e calidad hopi halto y costoso di bida cu cual Aruba a costumbra,” informantenan a indica.