Aruba Tourism Authority cu magnifico honor na Aruba Invaders Steel Orchestra

The content originally appeared on: Diario

ORANJESTAD (AAN): Diadomingo na momento cu Parada Grandi di Carnaval na Oranjestad

pasando den Lloyd G. Smith Boulevard a yega na e edificio di Aruba Tourism Authority, como sorpresa a honra e banda ‘Aruba Invaders Steel Orchestra’.

   ATA a haci esaki, pa e dedicacion di The Invaders y e rumannan Connor, na e musica di steelpan y cultura di Aruba.

   E rumannan Connor a keda sorprendi cu esaki, y aki ta unda Parada a stop un rato pa menos di 5 minuut.

   CEO di Aruba Tourism Authority, Ronella Croes a felicita e grupo y tambe a mustra cu nan ta reconoce nan como un parti critico di e historia di Carnaval di Aruba.  Asina a presente na nan un plaquette na unda a mustra cu ATA ta celebra y reconoce The Invaders pa nan fabuloso contribucion na comunidad local como e rol vibrante di tocador di steelpan.  Nan a expresa gratitud pa nan impacto continuo y dedicacion na enriquecimento cultura musical di e isla.

   Croes a manda danki pa ta asina consistente di loke nan a haci pa historia di Aruba, y pa Aruba su carnaval.

   Connor na su turno a bisa cu danki na e empuhe di ATA, mundo lo bay mira mas y mas kende nan ta pasobra hunto cu diferente stakeholders manera Scol di Arte, Go Cultura Foundation, VNO, y UNOCA, ta tur hende ta yudando pa nan subi y keda riba e pedestal cu nan tin cu yama ‘Aruba Invaders Steel Orchestra’ pa asina hopi aña caba.  Y ainda nan no a cansa!