‘Aruba tin hopi talento y a bin cu solucionnan basta creativo’

admin

Randall Croes di Camara di Comercio:

ORANJESTAD (AAN): Camara di Comercio ta un di e socionan di Ministerio di Asuntonan Economico y Comunicacion cu a organiza ‘Hackathon Oranjestad’. Miembro di directiva, Randall Croes a splica cu e motibo pa e institucion para tras di e proyecto aki tabata simpel y esta cu ta cuadra cu un di nan obhetivoan principal, esta pa fomenta desaroyo economico.

“Nos a duna nos aporta pa esaki tuma luga ya cu ta libera forsanan creativo y trece ideanan nobo, pasobra cu cambio y ideanan nobo, bo ta crea desaroyo,” asina e ehecutivo a comenta. Otro socionan cu a haci’e un realidad ta Oficina di Innovacion y VNO. Pa Camara di Comercio naturalmente, centro di Playa, ta keda un preocupacion y pesey a aporta cu logistica y energia na e proyecto.

Na final di e evento a puntra Sr. Croes riba su conclusion y a indica cu “Aruba tin hopi talento. Nan ta hobennan hopi creativo, bon informa di e situacion den caya y a bin cu solucionnan creativo pa trece actividad cu, en berdad, no ta resolve tur problema, pero at least ta un iniciativa cu por trece hende den caya pa bin cumpra y recrea.”

Di su banda, Minister mr. Richard Arends a duna di conoce cu e siguiente paso lo ta pa registra y implementa e idea ganador, pero cu tur cinco idea presente ta goza di e atencion di Gabinete Mike Eman II. ‘Hackathon Oranjestad’ a tuma luga e fin di siman cu a pasa.

 

Next Post

Congreso 2017 di IPA dianan 22, 23 y 24 di mei

 Transforming Teachers and the Community for the 21st Century through Practitioner Based Research ORANJESTAD(AAN)— Instituto Pedagogico Arubano (IPA) y su Centro di Investigacion y Desaroyo di Enseñansa (CIDE) den colaboracion cu Ministerio di Enseñansa y Maneho di Famia, ta tene un congreso riba tereno di enseñansa y investigacion. E titulo […]