Aruba ta produci casi mesun porcentahe ‘per capita’ di emisionnan CO2 compara cu paisnan industrialisa manera Hulanda of Japon

The content originally appeared on: Diario

Ton Tojer, Director di Utilities N.V.

ORANJESTAD (AAN):  Director di Utilites N.V. Ton Rojer tabata invitado den e programa Entrevista di Dia di e radioemisora Hits 100 FM, unda el a elabora riba un tema basta actual, esta energia.

            Mester bisa cu tin un crisis mundial di energia cu a trece cu ne un crisis economico, pero tambe social. Esaki ta wordo refleha riba varios tereno manera stock market, inflacion, prijs di productonan, etc. E guera di Rusia contra di Ukraine a ocasiona un serie di consecuencianan cu a bin ta florece y permanece mas awor despues di varios luna.

            Mientrastanto, na Aruba, recien gobierno di Aruba a anuncia cu ta bay traha un parke di molina nobo y esaki sigur lo ta un avance den direccion di produccion di energia di un forma renovabel.

            Rojer a duna di conoce cu n 2019 a cuminsa move pa Aruba distancia di ‘Heavy Fuel Oil’ (HFO) pa bay mas den direccion di energia renovabel. Esaki pakico? A bisa cu na Aruba tin biento y solo den abundancia.

            A enfatisa cu Aruba por haci bon uzo di e fuentenan aki y na mesun momento contribui na e cambio climatico cu ta un di e topiconan importante na nivel mundial.

            Rojer a agrega cu actualmente na Aruba mes tur hende ta kehando di calor y tur esaki ta consecuencianan di e cambio climatico aki.

            “Si nos no haci nada, nos ta bay den un direccion un poco mas acelera pasobra e consumo no ta bahando. Al contrario, e consumo ta subi”, a expresa.

            El a sigui bisa cu na Aruba tin un nivel di bida cu ta bon y cu ta duna comodidad den e forma di biba pa loke a consumo di coriente y consumo di awa. Pero di bo ta depende kico ta bay ta e costo.

            Rojer a indica cu e companianan di utilidad a absorba e aumento di crudo di HFO pa siete luna y tin hopi factor pakico. Tin e efecto di Covid, cu tey ainda, y cu a haci un impacto grandi riba e economia. No kier pone mucho presion riba e economia, pero no por wanta e gastonan pa largo, a enfatisa, pasobra e companianan di utilidad no ta want’e.

            Esey ta un di e motibonan cu mester a ahusta e tarifa. Ton Rojer a expresa.

            Pa loke ta emision di gasnan, WEB N.V., a agrega, ta contribui cu 60% di e emisionnan di gas, Transporte ta contribui cu 27%. Tambe tin e dumpnan cu ta contribui cu 13%.  E tres sector ey ta contribui enormemente na e emisionnan di CO2.

            Si compara Aruba cu paisnan industrialisa, Aruba ta cay ‘per capita’  9.3% y compara cu Merca e ta 16.5%, Hulanda 9.9%, Japon 9.5% y esey ta paisnan cu tin industria. Aruba no tin industria. Actualmente Aruba su pilar principal ta turismo, a remarca.

            Con ta bay mitiga esaki? Segun Rojer, e manera mas rapido ta busca maneranan alternativo y asina na 2008 a cuminsa cu e molinanan di biento na Vader Piet.

            Riba e tema interesante aki lo amplia den un otro articulo.