Aruba ta gradici pa tur asistencia tecnico ricibi di IMF

The content originally appeared on: Diario

‘Spring Meetings’ na Washington

ORANJESTAD (AAN): Tur aña na april y oktober e Ministernan di Finansa y e Presidentenan di Banco Central di mundo, ta reuni na e oficinanan principal di Fondo Monetario Internacional (IMF) na Washinghton.

   E pandemia a pone cu pa 2 aña largo e mandatarionan no por a topa cu otro personalmente pa por reuni, informa y intercambia pensamento riba topiconan di interes mutuo di e mundo financiero. E siman aki pa promer bes IMF ta habri porta pa ricibi un grupo relativamente chikito den e reunionnan anual di ‘Spring Meetings.’ Pa e evento aki Reino Hulandes como un di e Paisnan donor di IMF ta presente y Minister Maduro di Finansa tambe ta forma parti di e delegacion di Reino Hulandes.

   Aruba ta gradici pa tur e asistencia tecnico ricibi di IMF:  Minister Maduro ta hiba e mensahe di gratitud pa e bon cooperacion cu Aruba a ricibi fo’i IMF den e ultimo añanan. IMF a brinda asistencia tecnico riba diferente tereno, entre nan, reforma fiscal, gastonan di personal, a valida cifranan di cuenta anual di Pais Aruba, a valida modelo macro-economico MARUBA di Departamento di Economico y mas recien a haci tambe un investigacion pa e mehoramento di e servicio di Aduana.

   Banda di esaki, IMF cada pasa dos aña ta evalua e sistema financiero y economico di Aruba, cu ta resulta den informacion macro-economico importante pa e credibilidad financiero di nos Pais. Minister Maduro ta contento di por a conta cu e sosten di IMF su team tambe durante e pandemia y por informa cu tur asistencia brinda pa IMF ta worde uza pa desaroya e cambionan necesario na bienestar di Aruba.