Aruba ta e unico pais cu por cuminsa stop recorte di 12.6%

The content originally appeared on: Diario

Secretario di Estado Alexandra van Huffelen a indica

ORANJESTAD (AAN): Durante e conferencia di prensa cu a tuma luga dialuna 20 di juni, despues cu e reunionnan tocante COHO y RAFT, Secretario di Estado Alexandra van Huffelen a duna di conoce cu Aruba ta e unico pais den Reino cu a acepta e condicionnan pa por cuminsa stop e recorte di salario di 12.6%. Curaçao y Sint Maarten no a acepta e condicionnan aki.

   Anuncio publicamente di Secretario di Estado: Manera ta conoci, dia 20 di mei, 2022, Secretario di Estado van Huffelen a anuncia publicamente cu e paisnan den Reino lo worde permiti pa cuminsa stop cu e recorta mientras cu nan ta cumpli tres condicion pa cu esaki.

   Prome Minsiter di Aruba, señora Evelyn Wever-Croes, den conferencia di prensa a confirma e noticia aki y a informa tambe kico e 3 condicionnan aki tabata na e momento ey. E prome condicion tabata cu e recorte di 25% di e politiconan lo continua. Gobierno semper a indica cu lo sigui haci esaki. E di dos condicion ta cu e suma pa paga back mester ta den presupuesto. Cu esaki tambe Aruba ta cumpli cu ne. Y e di tres condicion ta cu mester pasa e ley di Landsverordening Normering Topinkomens (LNT), e asina yama Wever-Croes Norm.

   Prome Minister na varios ocacion publicamente a duna di conoce cua ta y a splica tocante e tres condicionnan aki. Tambe el a bay Parlamento pa informa di e condicionnan aki. Mayoria den Parlamento a confirma cu ta bay di acuerdo pa cumpli cu e condicionnan aki.

   Transparencia: Prome Minister a indica cu tur esaki a bay den tur transparencia y dialuna 20 di juni, Secretario di Estado van Huffelen a confirma cu Aruba ta e unico pais den Reino cu ta canando e caminda aki.

   E ta referi e caminda di cumpli cu condicionnan pa asina por cuminsa stop e recorte di salario. Curaçao y Sint Maarten no ta cana e caminda aki.

   Sindicatonan tambe a reuni cu e premiernan di Aruba, Curaçao y Sint Maarten y cu Secretario di Estado van Huffelen. Den e reunion aki, tanto e Secretario di Estado como Prome Minister di Aruba a splica nan con e procedura ta bay pa Aruba por yega pa stop e recorte.

   “Plan y intencion ta te ainda, y tur trabao ta worde haci pa logra esaki, pa paga empleadonan nan salario completo back na juli proximo”, Prome Minister Evelyn Wever-Croes a enfatisa.