Aruba ta cla pa e di 4 edicion di “Vow Renewal” na Eagle Beach

The content originally appeared on: Diario

Despues di 2 aña di break…

ORANJESTAD (AAN): Despues di 2 aña di break, diahuebs awo, dia 11 di augustus, e di 4 edicion di Aruba su ‘Vow Renewal’ lo tuma luga na Eagle Beach, durante bahada di solo. Te cu e momento aki tin 175 pareha registra, e mayoria ta for di Estados Unidos.

            Pa prome biaha e ‘Vow Renewal’ lo ta accesibel globalmente via Facebook y Instagram live-stream, pa di e forma aki parehanan por comparti e experiencia unico aki cu nan famia y amistadnan.

            Ronella Croes, CEO di A.T.A. a remarca: “Aruba ta contento di por invita parehanan pa ta parti di e tradicion romantico aki na Aruba. Nos ta honra cu parehanan rond mundo a scoge Aruba como e destino pa celebra nan amor.”

            Mester bisa cu ta sumamente contento di por conta cu parehanan cu ta casa algun aña y otronan cu hopi aña casa, incluyendo parehanan cu mas di 50 aña casa.

            E evento aki ta trece cobertura pa Aruba, particularmente den e segmento di romance, un segmento cu ta ricibi hopi atencion di A.T.A. y socionan den mercado. Ya caba diferente prensa y medionan di comunicacion den diferente mercado a promociona e evento aki.