Aruba ta celebr’e cu sentimentonan mixto segun Edward Maduro, dirigente sindical di SADA

The content originally appeared on: Diario

Awe ta wordo celebra Dia Internacional di Douane

ORANJESTAD (AAN) – Awe, Diabierna 26 di Januari, ta wordo celebra e Dia Internacional di Douane, cu a wordo decreta door di e Organizacion Internacional di Douane, cu e meta di reflexiona riba e trabao di Douane.

Den entrevista cu Edward Maduro, lider di Sindicato di Douane di Aruba (SADA) el a menciona cu na Aruba nan ta bin ta celebrando e dia aki na grandi, ultimo añanan, hunto e Islanan ruman Curacao, Bonaire y actualmente tambe cu Suriname.

“Esaki enberdad ta un dia cu nos ta sinta refleha riba e importancia di nos trabao. Nos como Douane Ambtenaar ta haci’e pero e ultimo añanan aki nos ta haci’e cu sentimento mixto pasobra con cu bay bin e ta un dia di abo, cu bo ta celebra e valor di bo trabao, pero mirando e retonan cu nos tin internamente den cas, ta pone cu bo ta celebr’e cu sentimentonan mixto”, e lider sindical a subraya.

El a señala cu Douane tin hopi reto interno pero tambe, manera ta conoci, cu e doño di trabao, kiermen Gobierno. El a bisa cu esey ta e situacion di Dia di Douane, aki na Aruba. “Aki na Aruba  nos ta celebr’e un tiki mas chikito mirando cu e aña aki Suriname a tuma e celebracion over, y nos tin un delegacion di Aruba cu a bay Suriname. Tambe tin delegacion di Curacao y Bonaire cu a bay y pa e motibo aki nos no tin mucho actividad e aña aki”, Maduro a expresa.

El a agrega cu SADA ta keda celebr’e cu positivismo y speranza cu cosnan por drecha, y kizas proximo aña lo celebr’e den cas y cu un sentimento mas alegre y orguyoso di e uniform cu Douane ta bisti.